✰✰ ✰✰ ✰✰ ✰✰
Báiyór mokkón gomor zala
Uñir nán súre dhúlor mata.
Ador beraiya háthi segá
Aiyó saitó álór mela.
Saitó aiccé falar git
fuwar maa nán lambá Zilfi
Óile zodi fuwar maa
Ador goríbané hooná.
Aiyó saito álor mela
Doot diyé kírkeri kula
Tuiñ no aái aiccé tuáñr mon fizara.
Ador lager fosón lager
Foittó dinná juwaingar hotá
Fúinté fúinté oiyé bedicá
Ador nolái táikki aññí
Fosón nolái táikki aññí
Tuáñr bubu azur nái
Zuror hoitor fai.
Cúnar hanfúl dhúlór muk fán
Fináibó hoói ruwaruilla misa
Bekar óiyé han fúra.
Cúnar hota rufar hotá féla
Tar hátor fálar oñçí
Dito himmot nola.
Ó coki… aññí besara…,
Nake muke ham e ham
Nahol eridi goru zirailé
Áñra fóre ruwa tan.
Ham ó no uoza ek fúça
Fáça goru cíñg behañ
Manúic óiza órainná.
Bát ór hotá niriccá
Foran base hóro háñzi
Haá fóre bola zuri.
Mondú baçí hoor finí
Zuñír thala báñga kiki
Manúic kuwálón gín lagefán
Kuwal fáça aññr zibon.
Zór no fai meçi fárer
Doñghol lagai faní túli
Ki! dukkór harbari
Fotú siyon ar boddán
Miyai ruiyí dé ruwa
Zórgiyé uri roide fúwa.
E ruwa gún faní failé
Dán oibo thuwá thúwá
Aññára mili goijjúm fátiya
Zór diferóná Asman wala....
Ceer ór kisím: Áillá Cairí
Lekóya : Kuwáiccójjá
Maání [ခက္ဆစ္]
- Áilla cairí = ေကာက္စိုက္ေတး။
- juwaingar = လူပ်ဳိ။
- dán or thúwá = စပါးႏွံ။
- dhúl = ဗံု။
- Doñghol = ခႏႊဲ။
- Fáça goru = ႏြားပိန္။
- fatiya = အလႉပြဲ။
- harbari = လုပ္ငန္း။
- RUWARUILLA = ပ်ဳိးစိုက္သမား။
- mokkón = ဗံု၏ အစာ။
- ruwa = ပ်ဳိးပင္။
- thala = ခေမာက္။
- Zulfí = ဗ်ာဆံ။
- Zuñír = ခေမာက္ရွည္။ ပကၠလာ။
- thala = ခေမာက္။
No comments:
Post a Comment