Padmavati (Baittá Kissá)
Singhalar rajjor shehzadi Padmavati tú Hiraman hoi ugguá tuta accíl. Zibár loi shehzadi hámishá hotá hoitó. Tuta ye roñgor roñgor kissá ókkol fúnai tou. Badsha ye tutar hássa diyai no faitto. Hiraman e zii yóre borbad der boli taartó. Etollá ekdin Hiraman oré mari félai bollá hokúm diye. Hiraman e shahzadir modot loi keéne-keéne fizarattún dái bonot giil goi. Bonot mazé faig maroya ekzon e dorí fellé. Faig maroyattún boun ekzon e kiniloiyé. Boun íte Chittor ór badsha Ratansen or dorbarot ham goré. Badcá ye hotá zanede tuta Hiraman oré aala kimot di kiniloi yé.
Badsha Ratansen ottún Nagmoti hoi ugguá bibi accíl. Nagmoti ye hiraman ore loi bagizat berai berai hotá hor. Ére Nagmotir cúndoror baabote hiraman ottún suwal goijjé. Hiraman e hoor dé, "Tuiñ ki cundor, folona singhal or shah zadir hañsat oddo ai no-fariba." Toi, Hiraman e Padmavatir cúndoror taarif goijjé. Ratansen e fúni oré beyuñc óigiyé goi. Mone nomaner. Dile no buzér. Badsha yé Singhalat zai óre Padmavati ré sai bólla faiséla goijjé. Badca ye 16,000 rot nal goijjé. Coinnó, bibi arde cóki bandi ókkol loi rowana diyé. Hiraman óre raabar banai yé. Badsha tará háñt doijja farai oré Singhalat foinssé gói. Ére badsha ye foir ór sonna dóri Padmavati ré bírai bollá kucíc goijjé. Hiraman e hóbor añráito. Hiraman e ekdin hobór di rajdan ór baaré neelai yé. Ratansen loi dola no oi wafes giyoi. Mogor, Padmavatittún Ratansen ollá monot ador fora cúru oiyé. Ratansen e Padmavati ré no failé morizaiboi boli faiséla goijjé. Etuunót badshar killat hámla gorí bollá buddi accé.
Foirór sónna dóri Ratansen arde tañir cóinno okkóle killat mazé hámla goijjé. Mogor, kamiyab nóo. Gandharvsen or coinnó e tara ré bandí félaiyé. Ratansen ar tañir cóinno re kotól goríbar cómot hiraman e Ratansen or sinno diyé. Badsha Ratansen e Padmavatir adorot accé boliyó buzaiye. Gandharvsen e badsha Ratansen oré fosón laiggé. Toi, Padmavati ré Ratansen loi cádidiyé. Aró hádiya hisáfe 16000 padmini bañdi yó padmavatir kérmosórla diye. (Padmini hodé Singhal ót sair kimsímmá miyala fuwain asédé entú ebbe baariq miyala fuwain.)
Zehón Padmavati arde badsha Ratansen biya shaadi gorí Singhalat tákilo. Bibi Nagmoti ye Chittor ottú tai soiñ accíl. Foila bibi ye faig ugguár di singhalat mazé hóñsar diferaiyé. Hoñsár faiyóre Ratansen e Chittor ot wafes zaibar faiséla loilo. Ratansen e zogotor cúndor miyala fua shaadi gorí fari monot oti fohór accé. Fohórai zoriyá wafes baicá diyedé ére doriyat mazé tuwán e faiyé. Tuwán ót mazé Ratansen arde Padmavati baade cóinnó beggún maragiyé. Aite-aite sóforot mazé Lokkí diyofori ye Padmavatir sonná dorí búlaito saiyé. Mogor, kamiyab noó. Doyoforiye tarár ador dekí kúci oi, ugguá hádiya diyé. É hádiya wa loi Ratansen e Puri hodé coorót noiya cóinnó sañti ekkatta goilló. Baade Chittor ót wafes ãigilógói.
Chittor ót mazé, Padmavati arde Nagmoti tará bibi dunizón badsha Ratansen ór noyanot baariq boni bollá zibbat diyat accíl. Cúru-cúru, taiñi bibi dunizonor hañsé háin loi-loi táki-takí taráre cánti goittó. Fisé-fise, boki fare, nosiyot gorí faré cánti gorá foitto. Éottót, Ratansen e rajdan ór hádem bounniá Raghav Chetan oré zidbatot fókkorai alin goijjé dé yián sobut óui decóttún nelai diyé. Padmavati ye hádem or mon hala (bezar) noófán taiñr háru ek gás hádiya diíl.
Raghav e Chittor ottún neelizai Delhi sultan Allauddin Khiljir dorbarot faná loiyé. Zehón sultan Allaudin e kimoti hárur hotá fusár loilo, hárur hotár fúáñti Padmavatir oti cúndorór taarif ó gorílo. Sultan e bounniár hotá funí fool oigiyoi. Padmavati ré hásel goríbár sail báfer. Toi, Allauddin e chittor rajjo ré kobza goríbollá girjje. Padmavati ré Allaudin oré gosái dibollá dabi goijjé. Padmavati ré dilé hamla no goríbo bolí hóbor diferái yé. Mogor, Ratansen e inkar gorí féllé. Aró boçayir salami dibollá hoi feraiyé. Allauddin e naras oi lagatar hámla gorat accíl. Laçái zehón kéma noór, akheríttún Ratansen e Allauddin oré súla gorí bollá killat mazé daawot diyé. Sulá nogorí bollá Ratansen-ór buddiman Gora arde Badal e maná goijjíl. Allauddin e sur gorí Padmavatiré ek nozor dikké. Beemaani gorí Ratansen oré dóri oré delhi loi giilgoi. Ratansen oré súraito mone hoilé Padmavati ré diya foribó boli corót diyé.
Padmavati ye Ratansen oré súrai bollá buddimaan Gora arde Badal ottún modot maiggé. Tarár buddi mozin Padmavati yé Allauddinor háttot zaibollá razi óiye. Allauddinor rajjor zaibollá Padmavati ye rot arde cóinno okkól nal goijjé. Rot salok hísafe bahádur sifayi okkól loi oré baicá diyé. Toi, Gora ar badal tará cóinno loi Allauddinor killat góillilgoi. Tará zaga borabar golíbar fúñáre-fuáñre hámla cúru gorídiyé. Boot maramari gorónor baade Ratansen oré súraiye. Mogor, Gora dái ãibaiccót maramarit mazé maragiyé. Padmavati arde badal tara Ratansen oré loi wafes Chittor or rajdanot aai giilgoi.
Ratansen no accíldé ottót Kumbhalner hákem Devpal e Padmavati ré biyá goríbár hóñsar diyé. Ratansen súri ãi baade zéhón nizoré beezzot goijjé hotá iin fuinne, bicí guiccá oiyé. Devpaloré sáñza dibollá faiséla goijjé. Toi, Ratansen e Devpal oré hámla goijje. Devpal e Allauddin loi mili óre gumsúm laçái óiyé. Laçait mazé Ratansen maragiyé. Ratansen or cékoctho fúni oré Padmavati có rajdan ór bera maragiyé dé cóki bañdi beggúlun e Juhár goríbar faiséla goijjé. Tará beggulún Juhár ór oinnot zábdi morí gelgoi. Allauddin e laçái fóta oi chittor or killá ré kobza goijjé. Mogor, háli killa gán baade ar kessú loot noofá. Padmavati tara oinnot furi sái boni giyoi. Allauddin besara háli haté afsúsot fori gelgoi.
E oti luksáni zid e Allauddin e cima sará lalsír notiza faiyé. Te Ratansen arde Padmavati ar Nagmotir sái múçot loi bicí ocánti oiyé. "Yian ottún basitó sailum". Allaudin e aró hordé, " Lalsir címa nái, abaadi,/ Eduniyai yian búlaiya ar othika/ Cimá sará lalsir mancé hásel goré lagatar/ Jivon fúrafán, te tar hoborot foñsé."
------** Hótom **-----
Torjuma: RohangKing
No comments:
Post a Comment