" မျှော်လင့်ချက်ရောင်ခြည် "
ရောင်နီသန်းနေတဲ့ မျှော်လင့်ချက်တွေ
တိတ်တိတ်ပုန်း ရှိနေသေးတာပေါ့
တစ်နေ့နေ့ ဖန်တီးရအောင်
ဧဒင်ဥယျာဉ်သဖွယ် ပြည်တစ်ပြည်
ဘယ်နှိပ်စက်ဖိနှိပ်မှုမှ မရှိတဲ့ပြည်
မတူကွဲပြားမှုကို ခွန်အားအဖြစ်
ဂုဏ်ယူမြတ်နိုးတဲ့ ပတ်ဝန်းကျင်လေး
အသက်ရှင်ခြင်းဟာ အပြစ်မဖြစ်စေရဘူး
ပျော်ရွှင်မှုရဲ့ ပန်းပွင့်တွေဝေဆာလို့
ငြိမ်းချမ်းမှုရဲ့ ရာသီမှာ အပြုံးနံ့တွေလှိုင်မယ်
ရောင်စုံအလှတရားတွေ မိုးလိုရွာကျလို့
အရာရာဟာ မြူးထူးလျက်နဲ့။
ဂူပိတ်ခံနေရတဲ့ မျှော်လင့်ချက်တွေ
ခုလဲ နိုးနိုးနန့်နန့် ရှိသေးတယ်
တစ်နေ့နေ့ ဖန်တီးကြရအောင်
မုသားတိမ်နက် ကင်းစင်တဲ့ပြည်
လူလူချင်းသတ်တဲ့ဓလေ့တွေ အမြစ်ပြတ်ပပျောက်လို့
ရှင်သန်ခြင်းဟာ မင်္ဂလာတစ်ပါးဖြစ်စေရမယ်
သေခြင်းတရားလည်း အိုက်စပ်စပ် မဖြစ်စေရဘူး
အဲဒီပြည်ဟာ မင်းတို့လဲပိုင်ဆိုင်မယ်
အဲဒီပြည်ဟာ ငါတို့လဲပိုင်ဆိုင်မယ်
သွေးထွက်သံယိုတဲ့ပြိုင်ပွဲတော့ လုံးဝကင်းစင်မယ်
ဓမ္မအရိပ်အောက်မှာ အဓမ္မတွေ နေဝင်မိုးချုပ်လို့
တရားရင်ခွင်မှာ ချိန်ခွင်လျှာတည့်တည့်ရှိမယ်
ဥပဒေဟာ လေထုလို မျှမျှတတ သာယာလို့
အရာရာဟာ ဖြူစင်လျက်နဲ့။
ဟော့ဒီလိုပြည်တစ်ပြည် ဖန်တီးရအောင်
အဲဒီပြည်မှာ ငတ်မွတ်ခြင်းထက် ထမင်းဈေးပေါစေရမယ်။
— ရိုဟင်လေး
No comments:
Post a Comment