Goin Fanír Mooti
Haba ye zuri zuri kuciye gaar oli
Ekka oddó nosíribo gumor e douri
Sanda mamu miyulate luwai gum giyé
Zilímilí tarar jahanot háñzi yó giyé
Sanor kulot gumzare tui mor foori
Cópponor falkit sorí goriló súrwari
Raitor oñccáré tortú kiyór dhor
Zehón tor dáke asi o nunuya mor
Mor kulot mazé tor tuinná gór
Uri uri aai mor faigorso sugór
San tarar dikká tui hañcic hamicá
Dilottú mor cúde yan hí duwa
Khala miyúla miçá faní boni bāi giyoi
Fúl okkól loi miçá-miçá hotá hoi giyoi
Tui yo ekka fun hotá rocá roci
Fuçá okkole sou keen gorí gaar oli
Tor loi basi asé añr guñra duniya
Dure zehón giyo buri aiyé sogor faníya
Tor tengot añí diyum raki
Cárá duniyar kullé kúci
Bezar óibi zehón diyum aza ador gorí
Añi dé golot tui éri sóyi nitti
Uzor nogoijjó sup oizó e ambor cón
Gum borá sukoré abar no goró seton
Honi kiya tor sugortú nofarefán gúm suri
Gumza re gumza goin fanit asé fán mooti
(Oli)
—RohangKing
(12-1-2023)
No comments:
Post a Comment