Ali Baba arde Salic Sur [Part-3]

Ali Baba arde Salic Sur

Lekoya Ω Kuawiccorjja ｜

Read here:

① Part One
② Part Two

Bák-Tin:  “Ali Babaré Tuwati”

O Murat mazé, Salic suraya ókkole aró cúna sañdi hodúddgún loi gúfar uzu aai zargoi. Tará biyák1 kúcit buzá zar. Tára házana aró barai bar kuci éri. 

“Aiyó! Añárar mal gún salamot2 aséné saigoi” sóddár e dak maijjé. “Gúfáttu honikká yé kessú loi ballá himmót e nodóribo. Zehón ítará saloi lotkaiya lac gúa dekí bóu, dhouré sérai bou. É boyankar3 halot e taráré abbar bafá baibo.”

Baade, sur ókkol beggún gúf-gúf gorí gúfár uzu zar. 

Zehón tará fattór gúar muúntú foñsíló, gúrattú fól mari fólmarí laimmé. Toi, tilismá duar gán ór muúntú giyé. Sóddar e “Kúliza… Sim sim!” boli dhak maijjé. 

Duwar gán kúli baade sóddare duwar baái góli gúfar sairó mikká sailó. 

“O bazi…horé giyoi. Lac gúa horé giyoi!” hoi sikkiran maijjé. Tarbaade, teñg oré merít guccá gorí mari oré sáñti ókkol ór uzu saiyé. 

“Aññí hoilám, sur ar ekzon asé bóli” hoi sikkirar4. “Añrá ekzon mari feillí montor5 ar ek suraya ai itar lac gúa loi gel goi dé.”

Sóddar e aró zehón gúri-garí sailó, tar mon aró hóraf o fán harbar dekílo. Aró mal hodún dahá nozar. 

“Añárattú ite honnua dé, ar horé také de yián tuwai dóri hamahá mari féla foribou” hoi sóddar e gufár butóre goille dé sur gún oré hoiyé.  

“Montor, íte honnúa dé yián añrá keené zani faijjum?" hoi ekzon e súwal goijjé.

“Íte lac loi giyoi dé yian loi éri…” hoi soddar e juwab diyé. “Añárar manúic ekzon coorót zai óre mancé ki hoor fúna foribou. Honó ekzon e to zani bóu. Manúic ugguá mara giye yá tuwai nofar de yián. Zettót añára íba honnuá de, ar íba horé táke dé zani faijjúm, Yá ar ekzon honnuá de tuwa aasán óizaibou.” boli sóddar e buzái yé.

“Aññí zaiyum. Íba honnúa de ar horíyar de yián añí tuwai nelaiyúm” boli sur ekzon e hoiyé. 

“Tui himmot oula arde salák ó. Ham yian bicí dorhari6 ham.” hoi soddár e cabáic7 diyé.

“Oi ze, añí hañsá tuwai faijjum.” boli suraiya ye hoiyé.

“Eén óile za, montor, tortú sónna8 bodola foríbó. Ugguá lamba zubba9 fin ar uggúa baicádar ór sonna dóríc. Mancóré tui coór yiánót noya aiccós boli hois. Hodún cúna yo loiza, hobór dorí báiccót lagibó. Manúic ókkol loi matic ar tará ki hor fúnic.” hoi cíkai diyé.

Baade tará gúfattu nioli aiccé, sóddar e “Bon óiza… Sim Sim!” hoi duwar gán bon goijjé. 

Tarfoddin, suraiya ye ugguá tikka oula zubba finní coórót accé. Códor okkól loi mal or baabote suwala suwali gorér. Te rosí, kurá, gusto, hoor or babote zani faijjé. Íte Kofír10 duwanot zai muusom arde bom-tom or babote hotá-batra hoiyé. Ité bagan ot, górot zai zai manúc ókkol loi dola óiyé. Ek cót hañsá haissá manúic loi dola oiyé. 

Montor honó kessú nofailó. Honókiyé manúic marahaiyé dé babote no hoiló. Honó kiyar mugóttún gúfar házanar hotá nó-fúné. 

“Aññí hodún mancór loi hotá hoilam mogor honikká yé mortú lagerde hotá gán no-hoilo” boli targá te báfer. ''Honikka ye lac guar hotá no-hoilo. Mui sórdar oré zai ki juwab diyum? Íba dé bicí gorom óizai boi. ''

Suraiya ye din bór ikká-uikká duñri duñri fusár goitté goitté óran oigiyói. Íte ekkán holibár duwanor dáke boi ziraiyé. Baade ítar zutar uzu sailóu. Dekhér dé zuta fáçí giyoi. 

Duwanot mazé ugguá burá holibá yé recómór Killa11 ugguá sílar de dekér. 

''Mor zuta gún ekká soo'' hoi holibáré zuta gún kúli daháiyé. 

''Tuñí eré façá dekor né?'' hoi holibáre fusár goijjé. ''Ehón andár óizaiboi. Tuñí dekhí bá né ya. Tuáñr sugé éto bol nofor faállá.''

''Noó kí? aññí deikkí. Cúkuriya . Añár sug ajó gom asé, sinta gorá nofori bóu'' hoi Mustafa holibá yé zuwab diyé. '' Aññí ajó óddo e coórót baríq holibá. Aññí ajó fúiñc ót mazé nize baze taga12 gólai fari. E coórót mazé añárnán sílai fare de eén honó beçain nái. ''

Te aró hoor dé, “Ho ekdin age, mui bicí dukkór ham oddó gojjillúm. Ugguá andár fulit13 mazé lac ugguár lá khamis sílai diilám! Ugguá miala fuaye ítaro górot loigiíl dé.''

“Ugguá mora mancór!” hoi te ammúk mikká óiye. Suraya aste-aste buijjá holibár hañsé zai oré, ″baade keén oiyé, ekká moré hooná! Kengorí moijjé dé?″ 

“Aññí tuáñré yiánor babote kessú hoi no faijjúm,” boli holibá yé fírai zuwab diyé. “Iin bedor14 hotá__ Aññí mila fua wáré no hoiyúm boli zuban diyí.”

Suraiya ye zubbatú cúnár foisá ugguá niolai holibá ré diyé. 

“Tuáñr nam ki nam ze, o murobbi sab?” Íte fusár loiyé. 

“Añár nam Mustafa,” hoi holibá yé zuwab diyé.

“Mustafa mou, aññí honó tuáñrtú moijjé dé manúic íbar nam zainto sair dé noó. Aññí íbar babote kessú zainto nosair. Cúde tuñí añáré íbar gór gan dahai do. Aññí tuáñré bout tiyañ diyum,” boli suraya ye háñci háñci hoiyé. 

Mustafa holibá ye hotún báfi lo. Baade uite diyé dé foisá wá bóri loi óre “ Aññí kucíc gorí sai” boli hoiyé. “Montor, miala fua wá ye moré sug bañdí loigiyé dé, yíanollá mui de gór no-siním.”

“ Aiyó, ehón ére zai” boli dahaittha ye hoiyé. “ Tuñí odeode foilar dikká sugót hoor baindó. Abbar aite yó sug bandi feliyúm. Taaké, tuiñ gór yian no sinófán.” Tuñí kessú no dekílé yó, rastar abaz fúnifariná, Fúlor khucbó loi faribá, Aró háná-finár khucbo yó faiba. Iin loi gór siní bólla zeddúr faro éddur kucíc goró. Aññí tuáñré balá boccíc15 diyum.”

Een hoi holibár hátot tiyañ ar ugguá diyé. “Aññí kucíc gorí sai ” bolí holibáye mug-gali16 hoiyé. Yiar baade holibáye surayar zuta síla ejjé. Duwan gán ó thala maijjé17.  

Dahaittha yé oloiddá doñr nuwal ekkán niyalai baade Mustafa hólibár suggún oré cúndor gorí bainddé. 

“Ére,” dahaitta ye hoor. “ Aññí hamgoróni miala fuwa bolí mone mone kiyál goró. Foila bar gór yían ot zaite failá dé khucbo okkól, abas ókkol oré ótgoró.”

Tará dunízón neyeli zar cúru. Zaite foñtót modot gorí farefán, Dahaittha ye Mustafa hólibar dhuñwá sái doijjé. 

Ekká gorí zai Mustafa holibá tíyai óre fuñc fuñc gorí nake fúñwer. “Bol hári!18” holibáyé hoiló. “Honíkká yé añzinná bol hári hár. Ín bicí khucbo urér ána. Añrá fakká soi foñt bai zair deya.”

Hoek miníth baade, holibá ye hoiló. “Mor bandhák ottún mui gadár abas fúnomor. Añrattún foñt yián bái zafori bóde. Yian soi foñt.”

Ar hoddúr zai baade tíyai óre hoordé, “ Mui deki gura fuwa ugguár handani fúnomor. É besara wá gúm zaito mone no ho dé étolla foittódin áñzinná hande de. Zañ oibo ouk, añárá soi rastat así ar gór yían loot faite hañsáiye.”

Ar hoddúr áñri zai holibáye abar fúñc-fúñc nake fúñwer.“Añí gulab fúlor khucbo fair. Gulab fúl dekí mor fosónór fúl. Goto hailla yó mui gulab fúl or khucbo faiyóm. Gór Yían érí, ziyian ót mui hamis sílaitó accílúm. O bainá”

Gulab fúl or khucbo deki Kasímor góror kírkirir gulab or top ottún aiyérde. Holibá ye dahaitha ré Kasím or górot loigiyé dé, zeré íbayé hamis sílail. 

“Gom gom hoorde ne?” hoi dahaithta ye fusár loiye.

“Ói homór dé nóní” hoi holibáye zuwab diyé. “Montor, yian hon zaga de mui hoi no-farím. Ar har gór déyó hoi no-farím.”

“O cúida nái. Tuñí eddur hoi faijjo, bicí oiyé. Tuiñ deki moré bicí modotot gorí feillo. Dóro thiyañ iín lo, añí tuáñré duwanot abar barái di aiyí.”

Dahaittha ye zeb ottún hól meri19 ekkán niyalai góror duwarot hót diyé. 

“Eré, gór de beggún ek doillá” hoi mone mone báfér. “Aññí zehón sóddar cab oré aníyúm, e hól merír marhá yé hon górot dou tou loi góli añárar házana sur goijjé dé sur ore mara foredde, sinno faiyum.”

Dahaittha ye mustafaré duwanot barai di, sóddar ore hóbor hoi bolla murat giló. Te bafer dé, “ Sóddar cab aijja bicí kúci oibó. Cab bicí gorom de hísafe, e hóbor faile motton, añarar mal sur goijjé ítar siyará gunibó20.” hoi hoi háñcer. 

Tarfoddin biinná, Morjina ye Ali babar tarar lá nasta banar. Íbayé ek keteri Kofi banai yé ar hodun Hoñla sírjjé. Toi ibaye filot, fiyañla lamai yé. Dejher dé oulat21 mazé haibolla ruti nái. Baar tún kini aníyúm boli hoi, bazaror dhula wá hátot loi óre bazarot nili giyoi.

  Morjina ye bazarottú górot golergai dé ére duwarot noiya marhá ugguá kíyal goijjé. Íbaye hañse zai cúndor gorí saiyé.

“E marhá ibá dé goto hailla no accíl. Iba ki marhá oibou de yá? Honó betal marhá né? Zorúr hóraf mancé añár girós oré nuksan goittó diyéde óit fare.” hoói matá uñtai uñtai mone mone báiffe. Tói baade, íbayé gorót góli hólmeçi34 ekkán ainné. É goltit asé de gór biggúnnór duwarot mazé éndilla marhá okkól mari diyé.

“Een gorílé, ze marhá diyé te bekub oi zaiboi” Morjina ye baiffe. Toi baade wafes górot gelgoi.  

………………………………………………………………
Lobzór Maáni

1. Biyák = beggúlún. 2. Salamot = Hefazot
3. Boyankar = bicí dhorór.              4. Sikkirar = Guzorer.
5. Montor   = Mogor. 6. Dorhari = Zoruri.
7. Cabáic = Tarif gorón. 8. Sónna = ruf. Surot.
9. Zubba = Arobi kurta. 10. Kofí = Saa banai háde kofí.
11. Killa = Lamba feen. 12. Taga = Fúñtá.
13. Fuli = hambára. 14. Bédor hatá = Gufon hotá.
15. Boccíc = Enam. Hadiya. 16. Mug-gali = Futhki háñci.
17. Thala maijjé = bongorí feillé. 18. Bol hári= mas ya gusso re gulgul fagai rande dé sálon.
19. Hól meri = couk. 20. Gunibó = mone mone báfibo. 
21. Oula = sular gór.