Ali Baba Arde Salic Sur
By Kuwaiccórjjá |Bák-Dui
Kasím daásé Ali Babar ugguá cóñró bái. Te yó é farat mazé táke. É thoun ór namdár ugguá hoór códor. Kasím déki tiyañ foicá loi bicí cáre1. Mogor Ali Baba ré nosaá. Sáhita no goré.
Read Here : Alibaba Arde Salic Sur , Part One
Zehón Ali Babar bibi ye Kasím ór góror duar or muúntú tíyaiyé. Íbartú mone mone kúci accé, “Ebela, añára yó ettór gór kini faijjum” bouli báfi bafí kebar2 gán bajjai yé. Kasímor góror hamgoróni uggwá yé duar gán kúlidí gulgórot boito daikké. “Tuáñr falda gán ekká udár difari báné? Mal mafitó lager de. Hailla aní difélim” bouli Kasímór bibi tú falda gán maiggé. E hotá fúni Kasímór bibir matát laiggé. Kasím ór bibi bicí cíyana3 ar salák. Kasím or Bibi ye, “Bodda ye falda gán magitó kiyóllá derferailóu?” bouli báfer, “Kii…? Zar tú gadá gún oré feth bórai hábaibar cókti nái, te falda loi ki gorér…?”
Bibi ye “Iin ki dana mafer saáforibó?” “Kintu mottú ki gorá fori bó dé yían mui zanom!” bouli hoói “Tík asé, aññí falda gán aní” hoi uolar uzu giyé. Íbayé uolat mazé faldar tole añçá lagai diyé. Toi, Ali Babar bibi ré “Dóro ze. Falda louya. Zetó dín mone ho éto din rakí faribá” bouli hoói Falda gán aní diyé. Íbayé baiffe dé, “Falda loi ziín mafibó mafouk, tolat mazé dé hámahá bazíbou. Toilé, aññárá zani faijjum.”
“Cúkuriya!” bouli hoói Ali Babar bibiye falda gán loi íbar júkuri7 gór ganót wafes aiccé.
Górot foóñsí motton cúna gun toraturi mafiloiyé. Baade, duñri duñri barizat giyé, zeré Ali Babaye gañt kurer. “O futíyár baf… O futíyar baf…, Añára dé dóni oigiyí gói!” hoi dak maijjé. Ali Babaye kúciyé boñl bajjár, “Añárá hondilla cúkkot fori zaimmoiyá! Añárár fua Khaled ó tuwangor oizaiboi ar te yó bicí kúcit tái faribo.” “Falda gán toraturi difélgoi, aññárar bédor hotá Kasím arde tar bou ye zanilé gom noibó”
Ali Babar bibi ye falda gán dito giyé. Mogor faldar tolat cúna bazí táikke dé yían kíyal noógoré. Kasím or bou óre falda gán goisái diyé. Baade cúkuriya zanaiyé. Kasím or bibi yé “Mafi faijjó né” hoi fusár loiyé. “Bicí cúndor gorí mafi faijjí” hoi Ali Babar bibi ye tarif goijjé.
Zeen báfi falda gán diyé, eén tajjub oiyé. Saárdé Faldar tolat soiññór dana noó, soksokar de cú…cúna r thuuça4!
Kasím e fúni oré kúci oiye né? No…bolké aró bicí naras óiyé. “Añí een duk gorí oddo tura mal hamai nofarí. Bodda ye dargúa haçi haçi e mal hontú zurai lo” hoi báfi kul nofar. Fóurón5 báiyór górot zaibollá sólla6 goijjé. “Bodda ye añáré misá hotá no hoibóu!” hoói zaito saar. Kintu bibi ye hoór dé, “Tará etuné gúm zaibo.” hoói oiñsé. Kasím e rait bór gúmzái noó fare. Fózor fáron farón óiye dé ottót nerattú urí Ali Babar górot zaibolla toyar oiye. Bibi ye horde, “Zailé, falda gán ó loizo, íbaté dahái farofán. Tarár bédor hotá añára zainní dé yían ót fafán.” “Bála hotá” én hoi falda gán loi óre toratorí Ali Babar górot zaibolla neyeli giyói.
Íbayé duwar baijjai yé. Ali Baba ye duwar kúlidiyé. Ali Baba ye báiyore góror duwarot dekí óre taajub óiyé.
“Salamualaikum, Kasím. Ai, bútoré ai. Aijja een sooré kiyóllá aiccós buzá” hoi daki gólaiye.
“Boddá, aññí tuáñr bédor hotá zainní. Tuñí hordé, tuñí uggúa goríb hacko haroya, mogor, añí hoifari de tuáñrtú cúna asé. Goto raitta iín maiffó. E mal iín horé faiyó ekká hooná” hoi fusár loilo.
Ali Baba ye kessú hoi nofaréfan gorér. “Cúna? Ki cúna. Añí uggúa gorib manúic dé tui zanos. Tuwañgor oitam boli murat zai gas hari háa foitto né?” bóuli Ali Baba ye juwab diyé.
Toi, Kasím e falda gán nelai dahái yé. “Goto raittá bábi yé falda yián dana duna mafi bóllá udár loil. Etunót mor buottú dilot cubá accé. Étollá faldar tolat añçá ekká lefi diyé. Zehón falda gán wafes dito accé, sairdé faldar tolat cúna ekkán bazí táikké. Yían saayá. Bujos né. Añra tuáñr bédor7 hotá zani faijjí zé. Boddá, añré ekká buzá saná?” hoi Kasím e sóbut có loi Ali Babaré daháiyé.
Ali Baba ye mone mone guner de, “ Mor bou wá hondilla laforba8 yá”. Ya, Ali Baba ar ári nofarer. Báiyore hámahá buzá forer.
“Kasím toilé fún. Añí faarót giyídé ére bicí taajub ekkán maamala oíye ” hoi cúru gorí kissá guñra buzáiyé. Ére cíl uggúa asé yían, dhañhait okkol e cúna, rufa, tiyañ, foicá ókkol zoma raké dé iín, tilismá hotá loi házana kúli fare de yían e.e ekkán noeri furafuri buzáiyé. “Dór! entú cúnar tiyañ tui eddók loiza,” boulí Ali Baba yé diyé.
Ebela Kasím é abas norom gorí báiyóre báilder. “Boddá, moré ekká dahái désana ar tilismá sabí wá hoosána. Mui túra loibollá.” bouli hoói fusár loiyé. Bái yé yó, “Añí toré dahái diyum. Mogor tui honíkkia ré no hoibí bóli wada gorá fori bóu.Tui loi baade baaki táibou dé iín beggún añár. Tor honó hóq notákibo.” bóli Ali Baba ye wada goittó hoiyé.
Kasím e yó razi ói wada diyé. Baadé Ali Baba yé Tilismá gúfa wa dahái diyé.
Laloccá Kasím e ar boddaic noó goré. Biínná kúp soóre beil no ulibár age urí, gadá 10 wá ar doñr doñr sónduk9 ókkol loi dhañhait or házanar gúfa aséde murat baicá10 diyé. Kasím e añiththa11 gorí cúnar la giyé dé noó. Te beggún kusai asai loi aní bár mon.
Báiyór dahá diya mozin zai tilismá12 ciíl guar muúntú asánir sáñte foóiñssé. Gadá gún óre ciílor muúntú gasót bañdí ejjé. “Kúlizá …SIMSIM!” hoói bútore góille. “O bazí! Cúna okkól saáwá…! O bazi! Recóm or hooror thal ókkol wá. É tíya…! Aññí aité añáré hon ugguá yé deikké fán laiggé. Duwar bon gorí félai. “Bonóiza SIMSIM!” Ki bála hotá, duwar gán bon óigiyoi. Ebela ziín loito mone hoór iín lo! ” bouli Kasím e asuhásu13 gorer. Húñc aráiya mikká óiye.
Te íyan bóri boné, wan bóribóne diyakúlat14 fori giyoi. Lalos gorí te górot lozai no faríbóu dé eduun bóijjé. “Óiye aijja edun loizai, hailla abbar accúm, yá hoduun loizaiyúm. Fourú yó accúm, eén goitte goitte biggún aññí loizaiyúmmói.” hoói mone mone fárot15 oiyé. Ze óttót cúna rufa bóri wafes aibollá toyar óiye, asimbit tartú duwar kúle dé tilismá hoór16 gán foórái giyoi.
“Kúliza, señséñ…, Kúliza, keñkeñ…, Kúliza, sañsañ…, een ká ekkán óddo noór á! Uff! ” hoói hoói matá uñtai uñtai monot gorér. Mogor, tartú soi gán no aiyér. Te dhoré aró biyulá17 mikká ói giyoi. Gaa agagura gámor furá zórer. “Háiré! e dón baráibár lalsí yé ajjá foran óddo háraim faállá” hoói nizoré duic7 der. Guccá gorí boskát bóijjíl dé cúna rufa biggún abbar dháli diyé. Ekkán baade ekkán howát asé. Lékin, duwar kúlibar hóbor oddó nái. Dhañhait aibár ottó18 ór gai.
Hotuun baade Kasím e gúra ek zák aiyer dé kúñrir abas fúner. Kúñrir abas zetó zetó hañsé aiyer. Kasím ór loo sórot19 ói zar gói. Aró abas fúner dé, “Hára hára eri abar zaaforí bo. Ar ekzon dónir hóbor faiyí” hoi kéthkerat dé abas ó Kasím e fúner.
En goitté goitté, Baáré dhañhait or dai gúf gúf gori cílór muúntú foóiñssé gái. Dehér dé gadá ek zák gasé gasé bainná. Fiçór uore doñr doñr sónduk ókkol ó asé! Dhañhait biggún ammúk óigiyoi. “Iín ki…ki dekir… iin ki deházar…!” hoói hoói fána oigiyó. Dhañhaitor sóddár e hoórdé, “Añárar gufon20 hotá honoikká yé zanifélaiyé fánlar. Hára taré tuwo…” hoói sikkarai maijjé. Gúra gunóre atáli fatáli mari eri diféillé. Tará bóñ bóñ tuwar. Honíkkát tuwai no failó. Ekzone hoordé, “Gúfar butóre honó góli faijjé né? Te honó Tilismá sabí ré zani feillé né?” hoói buddí diyé.
Dhañhait beggúné zar zar kiris te te neolai dóri óré, cíilor muúntú zai tíyaiyé. Sóddáre “Kúlizá…SIMSIM” hoiyé motton duwar gán kúli giyoi. Dhañhait ókkól bútore gólibar fúñáti fúñáti Kasím e asimbit guzori nioli undur dárfán dárgoi. Dhañhait ókkolé loorai dóijje. Dui zone mara cúru goijjé. Kasím ó foran basai bólla wafes marar doijjé. Mogor, 40 zon loi faron mockil. Kasím or niyaic aiyér ar zar!
Kasím oré dhañhait e dóri feillé. “Tui honnúá? Tui eré keén gorí góillos? Añárár cúna rufa tui horé loizor dé? Ho…ho” hoói latí gúcá arde uñri uñrí sóddár e fusár goijjé.
Mogor, Kasím é honó juwab di nofarer. Tar foran zar zar óiye. Sóddar e guiccá gorí, “Añárar malot hát dede mancór hálot eén gorí dé yá!” hoói kiris loi kuf maizzé. Ek kuf e Kasím ór foran neligiyoi.
Kasímor laic oré merit félai eri dhañhait ókkolé bútore tarár mal sek gorér. “O bazi, sawá duwaror hañsat boksá hodun!” hoói ekzon e guzori uiththé. “Ítede añáraré fána yo goijjé. Boska iin biggún bóri loizai bár sail21 goijjé dé óibo.” hoói afsús hár. “Honó tar fúñati aró manúic cíar aséné mottú cubá asé!” hoói sóddar e ocánti óilo. “Aró boská yó ho ugguá dahá nozar,” bóuli dhañhait ek zon e icára goijjé.
“Ek zon de fúraifillí, ar honó kiyó táile dhore tar foran óddo hafefán gorá foribóu.” bouli sóddár e kirissán uor mikká tuli dóri lacór yíañt giyé. Itaré sal loi taki félo, taáke, honó sur e añárar malor íkka suk dite dhora!” bouli tar sáñti ókkol oré hoiyé.
Dhañhait e Kasím óre sal loi thaki ejjé. Baade, duwar gán óre bonóizá Sim Sim hoi bon goijjé. Toi dhañhait beggún gúrat urí abar fíri giyói.
Kasímór bibi ye toun22 din gorór duwarot Kasím oré soiñ accíl. “O Kasím, tui horé? Tui kiyóllá ére gilidé ya” hoi maze mazé abas de. Zehón beil góilloi, guñra córót andár sái giyoi. Tuó Kasím ór dahá nái. Bibi ye ahol gorí duñri duñri Ali Babar górot giyé.
Zehón Ali Baba ye gorór kebar kúilé, Kasímór bibi ye bútore góli hander. “Tuáñr bái Kasím ajó nó aiyé. Binná beil no uríbar age lotí doccúa gúra loi neyoli giyoi dé ajó hóbor nái. Mortú honó mosibotot foijjé fán lager. Ebela añí kigoittám? Meerbani gorì tuiñ añáré modot goró.” hoi hander.
“Sinta no goríc! Añí ehón murát tuwai tó zaiyum. Tui górot zagói. Añár fúñáre añár báiyore hámahá aníyúm. Tui añár lá soiñ goríc, añí ehón accúm ” boulí hoi bus diyé. Toi, Ali Baba ye tar gadá wá loi tuwai tó neyoli giyói.
Ali Baba ye rasta rasta dak marer, gastala, zoñlot tuwar. Nam dóri dorí dhaker. Mogor, honó ek zon oré loot noófá. “Añí een ká tuwai nofair deya. Tar gadá gún óileyó loot fa nofoitto né?” hoi mone mone hoor.
Báfi bafí gúfar muúntú zehón foiñssé, hodun loor fúça deikké. “O maa! Iin ki dekír? Honó Kasím gúfar butóre né?” hoi dhoraiyá mikká óigiyoi. Zettót bútore góli sailó, dehér dé ajib maamala. Manúic uggúa sal loi lotkai raikké. Hañsé zehón zai sailó, Ali Baba guzori uiththé, “Ibá dé añár bái Kasím yae!” hoi boi handar cúru.
Ali Baba ye ekkán saddorot23 mal beráiyá buska24 ugguá dikké. Toratori mal gún félaidí saddor gán loi Kasím oré berai yé. Baade gúfattu niyolai gadát mazé tuilé. Lacór uortún hodun zoñl záfaidiyé, taaké mancé ót nofafán. Abbar firí gúfat góli oré,
“Kessú mal loilé gom óibo, boská gún hoñtté háli loizair” hoi boskát mazé hodun boijjé. Baade gúfattu niyoli “Bon óiza Sim Sim” hoi ciílor duar gán bon goijjé. Malor boskár uortun zoñl záfai diyé. Ali Baba ye gorót wafes niyoli ai zargoi.
Zehón Ali Baba górot foiñssé. Ali Babar bou ye soiñ roiyé. “Bicí ocántir hobór! Obazí…Añár bai Kasím maragiyé! Íbar lac añár gadár uoré asé. Yaa ítáro górot loiza foribó. ” hoi Ali Baba ye bibi ré buzái yé.
“O bái…Kasím, tortú ki óilo dé…?” hoi Ali Babar bibi ye bilak25 gorér.
“Kasím gúfat giyé. Ére mari féillé dé. Mor kiyalé, Kasím goille dé étunót dhahait foiñssé gáide óibou. Tará dori mari féille dé óibou.” boli Ali Baba ye bibi ré aró buzái yé. “E hotá honikká ré nohoic. Añí ehón Kasím oré tar górot loizaiyummoi. Añí gilé gói, tui baki mal gún gañrai félaic.” boli bibi ré hoi yé.
Ali Baba ye Kasím ór górot lacloi foiñssé goi. Toi, Kebar baijjai yé. Kasímor uggúa hamor mila fua Morjina ye duwar kúli dito accé. Ali Baba ye dekí dilot ekká faní accé. Kiyollá hoilé, Morjina ugguá salák sotur mela fua arde íbaré biccáic gorí faribo dé yian Ali Baba ye zané.
“Kasím gúfat mazé cúnar la giil. É cúna iín hodun suror. Tará Kasím oré dóri mari félaiyé.” bolí Morjina ré Ali Baba ye buzar. “Añártú ekká buddí accé” bolí hoi aró buzár. “Kasímór lac gúaré nisor thalat rakí goi. Añárá Kasím óttú biyaram óiye bolí hoi béd doijjúm. Íba dekí ibar hambárat mazé také boli hoiyúm. Tin din baade, Kasím biyaram loi entehal oiyé boli fúnaiyúm. Za…tor giros ni ré e horaf hobor gán ho gói. Húñciyar ar honikká ré nobuzaic. ”
Ali baba ye baiyor lac gúaré lamar thalat lukai eri baade tar górót wafes aiccé.
“Yade Kasím morigelgoi.” bolí Ali baba ye buo ré buzar.“Kasím or bibi wá dé ekzoinná oigiyoi. Añí bafírde añárattú íbar gorot zai tákon saa. Aro, Kasím or gór gan añárar górottú aró dhoñr. Morjina ye yó añárar hát arainná ham gorí faribou. Añrá íbaré cúnar tiyañ ho ugguá diyum de éri. ”
E din añzinná, Ali baba ye tar góror samana beggulun Kasím or górot áñrai feillé. Tar bibi ar fuwa Khaled ó Kasímor górot giyé goi. Raitta nizam ót cúnar fuicá gún kurí óre zuite zute áñrai feillé.
Tarfoddin biinná, Morjina deki dabair duwan ot giyé. Duwanot mazé coóror manuíc bóraiya. Morjina ye duwainna loi dhounr dhounr gorí hotá hoor. Daasé íbaye hoordé iin manúic beggúné fúnefan.
“Aññrtú tuáñr modot lager. ” boli hoi hañder. “Manúic ugguáttún bicí biyaram oiyé. Íbaré gom gorí bollá túra dabai dou!”
Yaa duwainna wáye boroi26 hodun milar. Abas fúni oré Morjinar íkka saiyé. “Hartú biyaram óiyedé , ki óiye dé …o zii.” hoi Hákim27 e fusár loiyé.
“Añár giros Kasím erí. Íbartú bicí biyaram. Harága bic bic oigiyoi. Hai loi yó no farer. Matiyó nofarer. ” hoi handi handi buzaiyé.
Hákim e bottle ugguáttú cada cada boroi hodún loi maiya fua ré diyé.
“Boroi iin haile gom ói zaibo gói. Fotti góndha yé duwa duwa hábáic,” bolí Hákim e hoiyé.
“Bicí Cúkuria” hoi Morjina ada goijjé. Baade gorót zai soiñ roiyé.
Tarfoddin biinná, Morjina dabair duwan ot abar giyé. Abar biggilune fúne fan dhouñr dhouñr hoor, “Mor malik Kasím ajó gom noó. Agortú aró norom óigiyé goi. Morttú íba nobasí bó fán lager. Íbar gar bic zagói fán kessú gom boroi douná?” boli Hákim óre hoiyé.
Hakím e fúni mañtá uñtar. “Kasím or biyaram barígiyoi dé yián fúni bicí ocánti lager.” boli hakim e afsús goijjé. Baade Morjina ré uggúa dabair botol diyé. “Ibartú dui camic or dore hábaidic, íba gúm zaifaribou.”
“Bicí cúkuria” boli hoi Morjina górot giyé.
Edin añzinná beil gólibar ottót, Kasím or goror dhakóttú añreddé manúic ókkole, “Kasím edé felai gelgoi more! O Cóki, O mor hoitoror zuri. Een ká félai gili goi ya! Mui ya kengorim?” hoi bilak dori Kasímor bibi ye doñr doñr sikeradde abas fúner.
Ebela, Morjina ye Mustafa hodé uggúa burá hólibár28 loi dola óito giyé.
“O Mustafa Hakku! ” hoi hátot cúnar foicá ugguá diyé. “Tuñí e coorót mazé baríq holiba boli hoi añí fúinni. Aññttú tuáñrlá ekkán bicí doró ham asé. Ekkan docá óiyé. Manúic ugguá maragiyé. Murda warlá uggúa hamis síla forer. Daasé cúndor gorí dofon29 difarifán. Manúic íbaré dou loi kuf ókkol mari marifélle dé. Íbar zohom gún dahá nozafan hamis síla foredde, buijjóné? Tuáñré dam ó bicí gorí diyum, mogor e hotá gin oinno kiyóré hoi nofaríba.” hoi buzaiyé.
Mustafa ye mialafua wár mugór íkka sai hoór dé, “Aññí fariyúm. Mogor tortú aró tiyañ diya foribó hotá gán gufon rakító sailé” boli zuwab diyé.
“Oí, tuáñré cúnar foicá aró diyum. Tuñí e mamala gán honikká ré hoi nofaríba, monot raikkó. Aró, Manúic íba honnúa dé arde ìba horé tákede ín ó nohoiyúm. Tuáñ ré ítaro górot lozai baiccót sug bañdi féliyúm.”
“Tik asé. Tui zeen hos éen goríyúm” bolí Mustafa holibá yé wada diyé.
“Een óilé tuáñ fúñc arde fuñtá loi óre mor fuáñti aiyó.” boli Morjina ye hoiyé.
Ibayé matar hor gánloi holibar sug gunóré doró moró gorí baindé. “Kessú daházar né” hoi mila fua wáye fusár loiyé. “No zar! ” boli hoi holibá ye juwab diyé. “Tik ase, ya ekku mottot górot zaigoi” boli Morjina ye hoiyé.
Morjina ye Mustafa holibá ré Kasím or górot loigiyé. Zehón górot foiñssé. Nisor talat gólai oré sug baindé dé hoor gán kúli diyé. Baade murda wá daháiyé.
“Tui ibárlá bolí hamis silaitó hoiyos de! O baazi, in dé bicí duk óibo. Moré cúnar foicá aró diya foríbo” boli holibá yé hoiyé.
“Faiba faiba” hoi Morjina ye aró duwá cúnar foicá ré holibár hátot diyé. “Tuáñrtú hára30 sílai diya fori bó. Aijjá murda ibáre Añárá dofón gorái féliyúm.”
Mustafa holiba yé fuñc arde fuñta loi sila cúru goijjé.
To be continue …
………………………………………………………………
Lobzór Maáni
1. Cáre = faárot gorí sole. 2. Kebar = duwar
3. Cíyana = Salák 4. Thuura = thukura.
5. fourón = éhon. 6. Sólla = Mocuwara.
7. béd = luwaiya hotá. 8. Laforba =
9. Sónduk = fethi 10. Baicá = sóforot zoon
11. Aiñttha = hom 12. Tilismá = Jadu
13. Asuhásu = 14. Diyakulat = rasta áraiya.
15. Fárot = 16. Hoór =
17. Biyulá = 18. Ottó = taim.
19. Sórot = tánda. 20. Gufon = luwaiya.
21. Sail = failain. 22. Toun = guñra.
23. Saddor = doñr hoor. 24. Buska = gaththí.
25. Bilak = handani. 26. Boroi = dabai.
27. Hákim = dakthor. 28. Holiba = hor síloya.
29. Dofón = hoborot diya. 30. Hára = tora-turi.
No comments:
Post a Comment