ရိုဟင်ဂျာဒုက္ခသည်တစ်ဦးမှသည် ကာယဗလချန်ပီယံတစ်ဦးအဖြစ်သို့

 

ရိုဟင်ဂျာဒုက္ခသည်တစ်ဦးမှသည် ကာယဗလချန်ပီယံတစ်ဦးအဖြစ်သို့

Unicode

ဇွန် ၈၊ ၂၀၂၁ |

အသက် ၂၅နှစ်အရွယ် နူးရ်ကဘီရ်ဟာ ကော့ဘဇားဒုက္ခသည်စခန်းမှာ သူရရှိတဲ့စားနပ်ရိက္ခာဝေစုနဲ့အသက်ရှင်အောင် နေထိုင်ဖို့နေသားကျနေခဲ့ပါပြီ။ ဒါပေမယ့်လည်း သြစတြေးလျကို ပြောင်းရွှေ့ခဲ့ပြီးနောက် သူဟာက ကြံ့ခိုင်ရေးနဲ့ကျန်းမာရေးပိုင်းအပေါ်မှာ စိတ်နှစ်မြုပ်ထားခဲ့ပြီး ယခု ကာယဗလချန်ပီယံတစ်ယောက် ဖြစ်လာနေပြီပဲဖြစ်ပါတယ်။

သူဟာမကြာသေးမီက ဘရစ်ဘိန်းကာယဗလပြိုင်ပွဲမှာ အနိုင်ရရှိခဲ့ပြီး လက်ရှိမှာတော့ သူဟာ လာမဲ့စက်တင်ဘာမှာ နိုင်ငံလက်ရွေးစင်ပြိုင်ဘက်ဖြစ်သူနဲ့ ယှဉ်ပြိုင်ဖို့ လေ့ကျင့်နေပါတယ်။ ဒါပေမယ့်လည်း သူ့ဘဝအကြောင်းကလွယ်ကူခဲ့တာတော့မဟုတ်ပါဘူး။ ကဘီရ်ကို သူ့မိဘတွေနေထိုင်ခဲ့တဲ့ ဒုက္ခသည်စခန်းတစ်ခုမှာ မွေးဖွားခဲ့ပါတယ်။ နေရာကျဉ်းကျဉ်းလေးလေးမှာ လူအများကြီးနဲ့နေထိုင်ရတဲ့ ကဘီရ်ဟာ ဒုက္ခသည်စခန်းကတစ်ခြားသူတွေလိုပဲ နေ့စဉ်အစားအစာအလုံအလောက်နဲ့ သန့်ရှင်းတဲ့သောက်သုံးရေ ရဖို့အခက်အခဲတွေအများကြီး ကြုံတွေ့ခဲ့ရပါတယ်။

“စခန်းအပြင်ကျွန်တော်တို့ထွက်လို့မရဘူး။ ဒါကြောင့်ရတဲ့အစားအစာဝေစုပေါ်မှာသာ မှီခိုရပါတယ်။ ဘယ်တော့မှလုံလောက်ခဲ့ခြင်းမရှိပါဘူး။ အထူးသဖြင့် ကျွန်တော်တို့ကြီးပြင်းလာတဲ့ထိတိုင် ဒီအတိုင်းပဲရရှိခဲ့တာပါ” လို့သူကထပ်ဖြည့်ပြောကြားခဲ့ပါတယ်။ ကဘီရ်ဟာ သူအသက် ၁၆နှစ်အရွယ်မှာ လှေနဲ့ သြစတြေးလျကို တစ်ဦးတည်းရောက်လာခဲ့ပါတယ်။ သြစတြေးလျမှာ နှစ်နှစ်ကြာထိန်းသိမ်းခံရပြီးနောက် ယာယီနေထိုင်ခွင့်ဗီဇာရရှိခဲ့ပါတယ်။ သူဟာ ၂၀၁၇ခုနှစ်မှာ ကြံ့ခိုင်ရေးကာလဗလမောင်တစ်ဦးဖြစ်လာဖို့ သူ့စိတ်ကူးကို စတင်အကောင်အထည်ဖော်အောင် အားပေးခဲ့တဲ့ ဒုက္ခသည်ဆိုင်ရာ စေတနာ့ဝန်ထမ်းဆရာဖြစ်သူ ဖီလ်နီဇွန်နဲ့ မတွေ့ခင်ထိ ဝန်ပင့်ယာဉ်(Forklift) ဒရိုင်ဘာတစ်ဦးအဖြစ် အလုပ်ရရှိခဲ့ပါတယ်။

ကဘီရ်ဟာ အရည်အသွေးပြည့်မီတဲ့ ပါဆင်နယ်ထရိန်နာတစ်ဦးဖြစ်လာဖို့ စတင်လေ့လာခဲ့ပါတယ်။ ကာယဗလနည်းပြဆရာတစ်ဦးဖြစ်တဲ့ စီမွန်စထရော့တန်နဲ့ တွေ့ဆုံခဲ့ပြီးနောက် သူတို့နှစ်ဦးဟာ ကာလဗလပြိုင်ပွဲတွေမှာ ပါဝင်ယှဉ်ပြိုင်သွားဖို့ စတင်အလုပ်လုပ်ခဲ့ကြပါတယ်။ နောက်ဆုံးမှာတော့ သူ့ရဲ့ဒုတိယမြောက်ပြိုင်ပွဲမှာ အနိုင်ရရှိခဲ့ပါတယ်။ ကဘီရ်ဟာ အလုပ်ကြိုးစားဆုံးသူတစ်ဦးဖြစ်ကြောင်း စထရော့တန်က ဖော်ပြပြောဆိုခဲ့ပါတယ်။ “သူ့မျိုးရိုးနောက်ခံအကြောင်း ကျွန်တော့်ကိုသူပြောပြခဲ့ပါတယ်။ ကိုယ်အောင်မြင်ဖြစ်ထွန်းချင်တဲ့ အရာဘာပဲဖြစ်ဖြစ် အောင်မြင်အောင်ကိုယ်တိုင်စွမ်းဆောင်နိုင်တယ်ဆိုတာ သူ့နိုင်ငံကကျန်ခဲ့တဲ့သူတွေကို သူကပြသချင်တာပါ” လို့ စထရော့တန်ကပြောပါတယ်။

ပြိုင်ပွဲတစ်လျှောက်လုံးမှာလည်း ကဘီရ်ဟာ ရာမသွာန်ဥပုသ်စောင့်ထိန်းခဲ့ပြီး သူ့ရဲ့စိတ်ဓာတ်ကြံ့ခိုင်မှု စွမ်းရည်ကိုပြသခဲ့သလို နှိမ့်ချရိုကျိုးမှုကိုလည်းပြသခဲ့တယ်လို့ စထရော့တန်ကချီးကျူးခဲ့ပါတယ်။ ကွင်းစ်လန်းက ကာယဗလပြိုင်ပွဲမှာ အနိုင်ရရှိခဲ့တဲ့ ပထမဆုံးရိုဟင်ဂျာအမျိုးသားတစ်ဦးဖြစ်ခဲ့တဲ့အပေါ် ဂုဏ်ယူကြောင်းကဘီရ်ကပြောပါတယ်။ “ဒုက္ခသည်စခန်းမှာ ကျွန်တော်ခက်ခဲမှုတွေနဲ့တိုက်ပွဲဝင်ခဲ့ရတာပါ။ ဒီစိတ်ဓာတ်ကို လေ့ကျင့်ရေးထိကျွန်တော်ယူခဲ့ရုံပါပဲ သြစတြေးလျမှာတင်မကပဲ ကမ္ဘာ့ပြိုင်ပွဲတွေမှာလည်း ကျွန်တော်တို့လူမျိုးစုကိုယ်စားပြု ယှဉ်ပြိုင်ချင်ပါတယ်။” လို့သူကဆက်လက်ပြောကြားခဲ့ပါတယ်။

Dhaka Tribune သတင်းဌာနပါ “From Rohingya refugee to bodybuilding champion” အမည်ဖြင့်ဖော်ပြထားသည့် သတင်းကိုညောင်နီရွက်(Myanmar Muslim Media)က မြန်မာဘာသာသို့ဆီလျော်အောင်ပြန်ဆိုသည်။

Zawgyi