မိန်းလိုက်ဖိ.... မချေ
မျဉ်းပြိုင်နှစ်ခု
အတူတူ ခရီးနှင်ကေလဲ့သော့်
ဆုံဖို့အမှတ်ကား မဟိမနား
ဟုတ်ယင့်… ငါ့ရို့လျှောက်ခစွာလမ်းက
မျဉ်းပြိုင်မဟုတ်
တစ်နိရာစီက နိပီးကေ
ကန့်လန့်ဖြတ် ဦးတည်လာခစွာ
ထောင့်ဖြတ်မျဉ်း နှစ်ခုဝေ
အမှတ်တစ်ခုမာ
အိပ်မက်မိုးတိမ် တကွက်ကွက်နဲ့
မေတ္တာရီရွာသွန်း လုလု
တနားချေ ဆုံခပနာ
ဖြတ်ထွက်လားခရေ
မျဉ်းချေနှစ်ခုဖြိုက်နိယင့်
နီပူတိုက်ချေလို့
မိုးတိမ်လိပ်ပျောက်ရေခါ
ဦးတည်ချက်ကိုယ်စီနန့်
ကျိန်စာသင့် ရာဟုလမ်းပိုင်
လှမ်းမမီအောင် ဝီးလို့ဝီးလို့ လားနီဗျာယ်။
ဆုံမှတ်ချေမာ လန်းဆန်းခစွာ အချိန်ချေတိကို
ခွန်အားအဖြိုက် ထုတ်သုံးပနာ
ကံကကြမ္မာလားလမ်းကို လက်ခံပီးလိုက်ဖိဝေ
မချေ… မပိုင်ဆိုင်ရေ အိပ်မက်ဘောက်သာနန့်
အရာ တဆာဆာ မမျှော်လိုက်ကတ်ဖိ
သဲပြင်မာ လီတိုက်လို့ ပျောက်လားခရေ
ဝတ္တုချေပိုင် မိန်းလိုက်ဖိဝေ…
— ရိုးချေ
(၁၄-၃-၂၀၂၃)
No comments:
Post a Comment