AZOLA CÁAZADA [Ekkán Ofúna Kissá]

Lekóya ♠ Kuwaiccójjá|

Ek zobanat kaci raijjór baádcá ar begom Sanda Maiyya ttún Azola hoói ugguá fuwa aiccíl. Fuwa bouli hoi ek mattro ugguá fuwa. Gura hale bab jan Kacika badcá yé ekdin fuwaré kulot loi sair guá sur oré boyankar sáñza diyé. 

Toktót mazé boi roiyé dé Azola ye endilla foriya ré boiyankar sáñza doun nán fosón nogoré dé étolla bicí dile duk fai eén báiffé.  

Fóir  oibó dé étollá fisór fisor zindegir báfi fari bár solaiyot asé. 

Aññí yó ekdin badcá oiyum. Endillá foriya ré insáf gorí baiccót ossé goloti óilé, aññár uore bicí mosibot aibó. Aññí yaa ar fisór zindegit mazé golti sáñza hái jahánnom ót lagi taá foribó. Ya aññí ki goittám. 

E mamala gán óre ót  san suuroti diyo ye dekí gaa dehá di óre zehón fusár loi ló badcá bointo nosar dé moncá ré zani-
Cázadaye zuzukot zaforibó dé mosibot oré dhora de étolla, e din loti diyo sólla mozin vuk náfáñg ór dikká lorsor sára boni giyé gói.

Tar hálot oré kermosdar oulé dekí Begom or hañsé éhon aros goilló- Begom e nize baze fuwa ré saái soyidé yían ótfái badcár hañsé zanai yédé ottót Gonoikka ókkol e fuwaré matai bállá doila bodoilla kucíc goijjé. 

Hána fína, kelna loi kúci goillé yó no faré. Haibar ottot no hábai rakilé yó no hañde, dor lafán guzor le yó no háre, kucí gori guzorilé yó no ó, guiccá gorí dak maille yó no faré, ador dehai háñcai tó sailé yó no fare, jadu ar nasa usa dehailé yó no dhora, háñti okkól, háf okkól, háñtiyar okkol, oin okkol loi tes goillé yó no dhora, cúndor cundor hoinna loi dola goilé yó no faré, cázadar dilot cúde zuzuk oré deker, ar kessúr sinta nái. 

Azola cázada 17 bosór ófan honó bodola nóo. Toí badcá yé gonokkia okkól oré dhaki buzáiyé.  Gonokkia okkol e “Fuwa ibá táile badcá , begom, yá dec dónco oizaiboi. E mosibot ottú uddár oito mone hoilé cázada re gañri féla foribó” bóuli aros zehón goijjé badcá ebbe bekuud oigiyoi. Éottót begom e cázadar dil fírai bollá cáyi combótti ar hókumoti gosái diyé. Mogor 7 din fán honó torki nofai bacáyé guiccá gorí rot saloyaré dhaki óre “hailla fóor fárilé itáré cáyi háñs fucák kúli felai agum murát rot tulí loijaisgói. Ére meri kurí gañri félaic” hoi hókum diyé. Rot saloyá yó badcá hókum or taábedari gorí murát loizai gáñt kurér dé ottót, gañt or uottún abas uggua fúni fíri saáddé, 
   “O rot saloya, kiyóllá gáñt kurá forer. Gunáttú yó basi, badcá bokcíc ó othalikka fosfán, ehón zai razdán ot maámala gun hoógoi” hoi zehón hoiló, rot saloya ye kúci ói torori badcár dorbarot giyé. Badcá có razdan or hásti begún ofúrani kúci óiyé.

Badcá yé fuwa ré murár bútoré badcáyi hamgosái di dháki aníbó bóuli kíyal góri  taim loi óré uzir nazir gulam tánjan beakgún loi muráttú barái ani bóllá sair dinnot din rowana diyé. 

Zehón murát foóñsílo, sáaddé fuwa fóir bonigiyói. Gaa gutora yó sug bazí taáfán cúndir óigiyói. Tói fusár loilo. O fut! Tui murát mazé kihái eén cúndor oiyosdé? 
O babjan húzur, murát mazé mui nun sára keñsa fata hái tákom de. 

Cúndor candór hoódé dilmon cánti asédé,  ocánti sára, guiccá sára mancórlá bóuli. 

Bála hotá, tuán babjaan ottú yó e ocánti sára fóir ali zibon hairto mone hoór. O fut, tui de ajó gura, din-dórmo yó hásél goillí. Étolla, babjan fóir boni farom fán badcáyi gán gosíló. Fisé boic barí ai fuwain ór bab bonilé, fuáin óre ham gosáidí fóir boni zaic gói. Toilé decóittá réyó modot goijjós fán no óibo nikí.  

O babjan, moot e gura burá no basé dé noóné. Okkól ottót moót aiyé dé noóné. Cáyi cómbotti hasharbar loito mone no hoórdé étollá etokkál fán buk náfang boni aicílam dé hoói lamba gorí buzaiyé. E hotá fúni badcá, begom ar uzir nazir có badcáyi hókumot eridi azibon fóir boni gelgói. 


Maáni (ခက္ဆစ္အဖြင့္)

Azibon = တစ္ဘဝလံုး။ 
Bab jan = ခမည္းေတာ္
bekuud = တုန္လႈပ္ေခ်ာက္ခ်ားသြားျခင္း။
Begom = မိဖုရား။
Cáazada = အိမ္ေရွ႕မင္း။
Gonoikka = ပုဏၰား။
Rot = ရထား။
razdan = နန္းေတာ္။ 
cáyi combótti ar hókumoti = နန္းစည္းစိမ္။
Raijjo = တိုင္းျပည္။

Cúna Sammá-r Kissá (သု၀ဏၰသာမ ဇာတ္ေတာ္ႀကီး)

Cúna Sammá-r Kissá
(သု၀ဏၰသာမ ဇာတ္ေတာ္ႀကီး)

Baranasí( ဗာရာဏသီျပည္ ) decór hañsé Mígasammada bor hál ( မိဂသမၼဒါျမစ္ ) ór far or ek hañsat mazé duiyán doñr doñr Zailla fara asé. É fara duní yán ot uggúa uggúa zaillar sóddar asé. É zaillar sóddar duní zón ek zon loi ar ekzon ador doya loi táké. Nizor fuwain cúwain óré ottó oilé apous ót biyá cádi goríbar wada ahát goittó.

Zaillar sóddar ekzon ottún Dúkulá ( ဒုကူလ ) hoi uggúa morot fuwa óiyé ar uggúattú Forika ( ပါရိကာ ) hoí uggúa zii óiye.  Duní torfór baf maar razi noma mozin Dúkulá ar Forika loi biyá óiyé. Kintu taráttú cáwat ( ကာမဂုဏ္ )ór eddur laalsí nai.

Baf Maa mori baáde duní zóné sólla gorí murat goile gói. Dúkulá ar Forika mura goillé dé yán diyor badcá yé zaní faijjé. É tolla Wísákrun diyo ré diferái ekkán ára baní diyé. Aró eré ebadot goittó aiyé dé manuic aibó e ára gán ar zinís sún estemal gorí faribá bolí lekíyó diyé.

Dúkulá ar Forika ye o leká ré deki diyó ókkolor modot óibo buli tari Bidíri hoor finí foir boní ebadot gorát accíl. Dúkulá ar Forika tará eddin añdá oi dukkót fori bódé yián diyor badcá yé zani faijjé. Étolla diyor badcá nize baze árat aái óre falon lalon or fuwa uggúa fai ballá Insaani nezam milmilat gorá fori bó hoí mociwara diyé. Kintu Dúkulá ar Forika e bicí inkar goijjé.

Een en né, Diyor badcá yé Forikar háñis ór óttót nagír ottú fusí loi ballá Dúkulá ré hoiyé. Dúkula yó émozin goijjé. Én gorónor daára Forikar ferot hámil oiyé. Zehón hámil doc maic oiyé Cúnar dillá fuwa uggúa zonom diyé. Cúnali roñgor de étolla Cúna Samma hoí nam túwaiyé.

Dúkulá ar Forika baf maa duní zon fuwa ré árat rakí murát gula gala tuwaitó zai to. Éottót fori ókkol é Cúna Samma re soiñl tó. Gadúwai dito, háñzi mazi dito, fúlor duloin ót dúlaito, dud hábaitó, aró diyo ókkol e yó soiñl tó.

 Cúna Samma 16 bosór fán baf maa ye lalon falon gorí arat tai to ar bab maa tará gula gala tuwai tó murát zaito goi. Ekdin añz ofán baf maa wafes zehón noaiyer, Cúna Samma yé ocánti ói murát tuwai tuwai baba maa hoí dak marer. Ek zagat zehón foiñssé, bab maa tará gula gala tuwat zóré boyaré accé dé étolla gastala uggúat góli dhuwa merit boiccí de ottót dhuwa merittú háf uggúa neali sép maronor dara sugór rucni giyoi boli hoíyé. E hotá fúni Cúna Samma yé hañder ó háñcer ó.(Hañder de kiyolla hoilé hom boicót baf maa duní zon añdá oiyé étolla, háñcer kiyolla hoile Baf maa ré kérmos goríbár mouka faiyé dé étolla.)

Tar baáde Cúna Samma yé baf maa ré busdi yóré hátot dóri árat daki loiaiccé. Árat ai Cúna Samma yébaf maa e ek zagattú ar ek zagat zaite ásan ofán rosí ókkol bañdí diyé, hána faní ókkol hañsé gorí diyé. Édin loti Árat mazé sáfayi gorí baf maattú lagedde zorurot ókkol fura gorí, sáñti hórin ókkol ór fúáñti gula gala tuwai tó zai to goí.

Cúna Samma yé foittó din faní bóri baiccót sáñti hórin ókkol e yó berai súrai modot goittó. Ekdin hórin ór gusto ré bicí fosón goré dé Piliyakká badcá ( ပီဠိယကၡမင္းႀကီး ) yé maa zan oré toittá razdáni gosái di hórin mari mari Árat hañsé foiñssé gai.

Áñzinná hórin ór kuñicé furai taikké dé hál or sorot mazé hórin mari balla cíyad doijjé dé ottót  Cúna Sammá deki hórin or fúñati faní boittó ayér dé deki manuic né, fori né foróg gorí nofarí  tiir mari diyé. Cúna Sammá tiir hái bab maa táke dé zagar íkka matá di balur sorot dúli fori guzorér. Hórin ókkolé dhorai óré íkká uikka dái giyé gói.

Ehón Pilíyakka badcá yó manuuc dé ótfái ye. Cúna Sammá bihúñc óibar age Pilíyakka badcá loge hotá hoité. Guiccá sára, ducmoni sára norom tobiyot ola Cúna Sammá r hálot oré fúni oré age dil doró guiccá olá accíl dé Pilíyakka badcár dil óddó fáiyoñg ór doil milai giyói. Étolla Cúna Sammár baf maa duni zon óré gorí hábai bo búli wada goijjé.

Dúkulá ar Forika r Árat  Pilíyakka badcá giyé. Fuwa Cúna Sammá no ódé yán aibár fúañré fúañaré bab maa ye ótfaiyé. Añdá dunú wá loi hotá hoí ló. Pilíyakká badcá yé  Cúna Sammár zagat gorí hábai bo bulí hoíyé. Kintu añdá baf maa duní zon é nó mané. Cúna Sammá asé dé zagat loi zai di bálla aros goijjé.

Pilíyakká badcá yó loi zai diyé. Balur sorot fori roiyé dé Cuná Sammá ré dorí torí sailó. Nó moré dé yan ót failo.   Eddurót Dúkulá ar Forika duini zon é dua magar cúru goijjé. Dua kobul ounor dara  tiir or bic udai giyói. Cuná Sammar ó faran uddár oilo. Diyor badcá yé dua di  Dúkulá ar Forika duní zónor sugór rucni yó fíri accé.

Cuná Samma yé  Pilíyakká badcá ré ebadot gorí balla, dan hórat gorí balla, dec bácí okkol oré  nizor fuwainór dilla ador gorí badcá yi sóyi kanun mozin hókumot goitó aros goijjé. Bahú Cúndori ar diyo ókkol oré yó dini dawot diló. Yá loti Pilíyakká badcá yó hórin or gusto ré ar fosón nogorí hédayot fai decót wafes giyé goi.

Maa baf ór ehsani ré siné dé manuic ókkol deki zehonó mosibot óttú uddár óifare. Duniyait mazé ar Akhérot ót mazé balayi ré hásel gorí fari bó.

Nuth: Kissá ré muktusur gorí leká giyé.

Mohá Zinok ór Kissá (မဟာဇနကဇာတ္ေတာ္ႀကီး)

Mohá Zinok ór Kissá (မဟာဇနကဇာတ္ေတာ္ႀကီး)

[Bormár kitafit mazé Buddó zindegir kahání 550 lói banai yédé 10 wá mocúr kissá asé. Ziín óré "Zed Grí Se Bué" (ဇာတ္ႀကီးဆယ္ဘြဲ႔)bolí hoú. Iín oré baittát"Te, Zá, Tú, Ne, Má, Bu, Sañ, Na, Wí, We"( ေတ၊ ဇ၊ သု၊ ေန၊ မ၊ ဘူ၊ စန္၊ နာ၊ ၀ိ၊ ေ၀) hoí monot goré. E doccúa kissáttú “Tú ar Bu" baáde ar añcto (8) wá kissá ré Minbú Saradow Uú Oú Ba Tá (မင္းဘူးဆရာေတာ္ ဦးဩဘာသ)  yé  leikké. Baki duwá ré Acín Kúmará (အရွင္ကုမာရ)  yé leikké.]

Ek zobanat Míttilla decót( မိတၳီလာျပည္ ) raj goittó dé  Badcá Arílá Zinok  (အရိ႒ဇနကမင္း) loí cóñro bái Cázada Pal Zinok (ေပါလဇနက) tará ek bái loí ek bái aanbon ói Larái cúru goijjé. É laráit mazé bor bái badcá mara giyé dé éttolla hámila Rani deki gorif ór bétdorí dái oré Hala Sampa Nogor ( ကာလစမၸါနဂိုျပည္) dec ót foiñsíllgói.

Coor ór baárór Zirani gór(ဇရပ္) ekkán ót boí accíl dé ottót Disapamourk saf ( ဒိသာပါေမာကၡ ဆရာႀကီး) uggúa loí loot faaí guzori giyóidé mamala ré zehón buzáiyé Caaf e Rahám hái íbar górot táito zaga diyé. Kessú cómo baáde Rani ttú zehón fuwa óilo "Mohá Zinok" hoí nam rakí lo.

Fonná foréddé ottót oinno fuwain hodun e Zinok oré  Rarir fuwa hoí hamicá técarái to. Zinok e coí nofarí Maa tú zettót fusár lo fuwa gura de étolla foila foila gúrai garái hoilé yó  zehon fuwa juwan oiyé mamala ré kúli buzái diyé.

É din lotí, Zinok cázada yé nizor asól zindegi ré dilot mazé yiad rakí  razdáni hókumoti zojba foida ói Baf or racteri ré onniyai gorí kobza gorí raikké dé  sañsa Pal Zinok loí larái gorí racteri wafes loiyum hoí báfa loí  Maa ye fúañti ainníl dé mal cómbotí ókkol oré barái bollá buth-códor(သေဘၤာကုန္သည္) ókkolór fúañti baicá diyé.

Zinok giyé dé zaháñs yían sómondór ór mazé doñr doñr goir ókkol maronor daara tottá fáçí faní góli oré asté-asté dhufí zar goidé ottót oinno sáñti ol dhorai fanít záb mára cúru goijjé.

Húñciyár Mohá Zinok e dil etminan rakí Gíyuñ dí mirá dí mari hái fet bóraiyé. Bazu dúti ré yó faní no góle fán Gíyuñ mazi diyé. Tar baáde dua magí Ruza r niyot goijjé. Iín gorónor baáde cóçór kúñrar matát baái urí Háñngor dillá hótara mas ókkol tú duré forefán boldi fál maijjé.

Jozba (ဇြဲ), kucíc (လုံ႔လ), hímmot (၀ီရိယ) loí dine raite ozirani háñsúrí báci aiyé dé hána okkól oré loot failé oddó Ruza no báñgi diloré mozbut gorí rakitó.

Mohá Zinok e

 “morot fuwainór jozba moillé home”

hoí jozbar sáñté háñsúri háñt dinóddin sómondorot mazé loot fail dé nanan doilla mosibot ol faar ói Míttillar Bagan or gáñçór ciíl ór uore hoor beraiya oizzíl gái.

Edinnot Míttila decót Pal Zinok badcá entehal oiyé dé háñt din oiyé. Rajteri gosíloiya morot fuwain nái dé éttolla  Fuccá Rot( ဖုႆရထား ) gúraibar entezam goijjé.

Fuccá Rot dazdáni mohól óre deñn háittá tin bar fak di óré coorót fak diyóré  asimbit coor or geath ottú neali  zimmadar ókkole fisé fisé duñrar cúru.

Baganot Zinok neri asé dé cíl lór coth ót  Fuccá Rot zehón tíyaiyé, layek oiné no emtan gorí bólla , tal bazoya ókkole ek fúañré mataiyé dé tal or zoriya seton oileyó badcá khún de éttola honó dhor bór sára sugún kúli sái giddi dójjé dé manuic ókkol dekilé yó nizam ót ar ek hait fíri giyé gói.

Gonoya ókkolé hor uidda óiye dé téñg or tola ré saí goni óre, "E manuic wá bazur bol takot, elóm lói bóráiyá uggúa manuic hámahá uaforibó" hoí badcáyír fucák finái óre ehtaram ór sáñte daki loi giyé.

Baáde niyom mozin Pal badcár zii sáyeba r háñsé halot biggún boyan zehón goilló, Zii sáyeba yé Sara badcá ré saí bálla húzur hanát aaí dola oitó dawot diyé. Hóñsár gua yé bar bar hóñsár dilé yó no fúne fán táki uzir nazir ókkol loi hotát tái zagoi.

Hóñsar gua wafes zai óre hotuún baáde nizor mon mozin cúnali razdan or húzur hanát saitó zafán gorí zai zii sáyeba Ciwali Devi r húzur hanát zehón foiñsé, aai salam goijjé dé Ciwali ré hátor dóri Cúnali tottót boí sañsá Pal badcár uzir nazir e aros goijjé dé bisar ókkol oré juwab di faiséla zehón gorí faijjé, sáyeba Ciwali Devi lói cúnár taz finí noya badcár rajterir mela goijjé.

Zehón badcá óilo Hala Sampa Nogor ót asé dé Maa Rani ré ar Ditarpamaurk saf oré Míttilar dec ót aní morobbir tobkadi raikké.

Badcá Mohá Zinok ar Rani Ciwalí Devi ttú zehón morot fuwa uggúa oilo tará bicí kúci ói hail fattór dúloin di "Diigavú" (ဒီဃာဝု) hoí nam túwaiyé. Diigavú cázada elóm cíkka furai 16 bosór óiye dé ottót íbaré Cázada( အိမ္ေရွ႔မင္းသား )r zimmadari gosái diyé.

Ek dinná badcá Mohá Zinok yé fuwa ré daki Cáyi Bagan( ဥယ်ာဥ္နန္း )ót  sáir goittó zaite gólibar mugót Aam báñi forefán doijje dé gas oré deki badcá ar cázada có fari háiye dé étolla fisóttú accé dé sáñti ókkol leyó faribár muoka fái zar age te kúci góri fari háiyé.

Bagan ór mazé mohol ót din thíyá kúci gorí añzinná wafes aiyéddé ére baganór mugór Aam gas wá théil déla( အခက္အလက္မ်ား ) ol báñgi giyói dé dekí zehón badcá yé fusár loiló tohón "Uzir e Azom e gula asé dé étolla gasór halot en óiye de, húzur, dákor gas wá gula noódóre dé  étolla eén noódé" hoí juwab diyé.

Yá lotí badcá yé "aññár cáyi dón combottí deki gula bóra gas loi ek doilla nóné ya, ducmon loi foittó din taallukat raká foréde zindegi nóne. Ducmon loi azur tákon foír ór zindegi, gula sára Aam gasór dílla."

Aññi yó burá ói giyí gói, étolla hoñl boiccá mor fua ré razdáni rajteri gosái dí Foir boni murát zai ebadot goijjúm mói boli hoí hótat duniyabi dón duolot, caán cuokót félai akhérot tuwai tó murát baicá diyé….

Háwala: mingala
http://www.mawluu.com/