SINDERELLÁ

SINDERELLÁ

Lekóya: Eng. Muhammad Siddique Basu
Tunoya: Kuwáccórjjá |


Bák EK

Sinderellá arde Átai

Boóut agor zobanat mazé, éçe uggwá dúñri beça aiccíl. Ítartu uggwá gura zíi aiccíl, íbar nam óiyede Sujjortab. Zeén nam eén cúndor aiccíl.

Ek din, beça íba yé Sújjortab oré beçi uggwá lói sinno gorái diyé. Beçi íbartú duwá zérfua asé. Sújjortabór baf e hoórdé, “Beçi íba arde aññí loi hailla cádi óibou. Íba, tor átai maa óibou. Ar iín, tor átaitou bóináin, Hílsa arde Gílza óibou”. “Ar ekkán bicí frecanir hotá, biyá ói móttor añártu hámaká lamba musáfer ót zaa foribóu.” Sújjortab bicí taajub óigiyói. Lékin, íba endila bicí cáda-cidá ar gom dé, aró maa sára maiya fuá hísafe maar kúci faibellá, íba yé noya gór-guccí ré mani loiféláiye. Ar Sújjortab é baf oré waada diyédé, “Óu baá, ítarattú ziín lagibóu lagouk aññí tará ré saiyóum.”

Sújjortab é fottí zon oré kúci rakí bélla bicí duk gorí ham goré. Íbar átai maa ye Sújjortab oré hámicá ekkán nó ekkán ham diyat táke. Íbaré Diyai yó nofaré. Hílsa arde Gílza ye dinthíya kélaá, ar cúk goré, noóile egezá mithái-tithái háat táke.

Sújjortabór átai maa ye hoórde, “Añár zíiyain ókkol bicí norom dé ótolla gór or thung-thang ham gorí no faríbóu”. “Ítara bicí bála, ar gura maiya fuain ókkol, hámakhá háandáni maincór fuain loi biyá óibou de.”

Sújjortab é íbar átaitou bóin ókkol ólla zedín-gorí-fare-édin goillé yó, ítara íba ré egeza bicí zilloti goré, ar técera.

Ek din Hílsa ye Gílza ré hoórde, “Saáwa! Suláttu hoila ókkol dola gorér de. Añára íba ré aijja loti Sinderellá (Maání-Hoila!) hoói dhakiyóum”.

❀❀❀❀❀❀❀❀❀❀❀❀


Bák DUI

Sinderellár hañsé Forima

É decór baccár fua ugguá biyar laikká oiye. Baccá yé fuarlá buo basá-basi gorí bélla doñr ekkán cóba goijjé. É cóbat mazé baccá yé fura decór hoinna maiya fuain ókkol oré doot diyé. Cóbattú ze hoinna wá ré baccár fua ye fosón gorí bo, íba baccár fut or buo banai bo bólí ellan diyé. 

É din ázinná, baccár hóborgwa ye baccár fuar cóbat mazé zaibellá dorozat aái yóre doot diyé. Gílza ye sikkarai hoórdé, “Añáráttu hondila fiñdá forerdé?”

Hílsa, Gílza arde ítarar maa ye bála uttom hoor ókkol findé. Sinderellá ye hoórde, “Añártu hondila fiñdá foribóu?”

Íbar átai maa ye gozgozai  hoórdé, “Toré noó dhake!” Ók hotá hoilé, Sinderellá ré yó, doot diyé, mogór íbar átai maa tú zana asé dé, kihoilé, zodi Sinderellá cóbat zailé, baccár fua ye Hílsa ré arde Gílza ré ebbre no saibóu.

Ítara gór ot guzi tákoya ókkol, ar cúndor ó éto noó. Sinderellá yé íbar átai maar hotá biccác noóza. Íba yé doot diyé dé ciñçí ré cek goijjé, mogor dehér dé ciñçí yían óre ooin ot zolai félaiye.

É raitta, Sinderellá yé íbar hamarát máze boói yóre cóbar baabote bicí ferecani gorí báfer. Íba yé “Aññí keén arzu goittám zaifari bélla“, mone mone hoói yóre niyác félar. “Tóile tui faribí,” hoórde abas uggwá fúner. Íba taajub óiyoré dehérde, fouri uggwá asimbit hontú aái giyégói. Fouri ye hoórde “Aññí tor Fourima“. “Aññí tor arzu fura gourí bélla aiccíde“.

Íba yé Sinderellá ré, gór or fisór barizar íkka, neelai loi giyé. Fouri ye íbar tara sonker de loçí loi fakkárai loiyé mottor, hoñçí (miçá houdú) uggwá, ekkán cúnar falki garí boni giyégói. Ar sair gwá undur cúndoijja dóla gúra boni giyégói. Duwá añsila cúdoijja falki garí-solouya boni giyói. Sinderellá yé hoórde “Kafí taajjuippa éná,”. “Mogor Fourimaa, añártu tó kessú fiñdí bélla nái.” Fouri maa ye áñci yóre íbar Loçí ré Sindrellár íkka abbar fakkárai loiyé.

Sinderellá émmikká saiyé ár, dehérde uggwá cúndoijja cóbar jagára (goówn) findá. Íbar sul ot mazé híra sonker, théñg ot mazé cóñço anar nasonir zuta findá. Sinderellá yé kúci yé guzori hoórde, “Cúkuria, Fourima!” Fouri ye úñcíar gorí diyé dé, “Tortú raitor nicír age, cóbar tú hámaká neeli zagói foribóu”. Mijík, rait nicí foijjonto táaibou dé. Sinderellá yé goríbóu bóuli waada diyóré cóbar íkka solai giyói.

❀❀❀❀❀❀❀❀❀❀❀❀

Bák TIN

Sinderellá Baccár Cóbat

Cóbat mazé fottí zon é kíyal gorérde, baccár fua ye sancúndorí noya maiyar uore díandóri saái táikke. Ar, fura rait fán honíkká lói no naser, seróf íbar lói baade. Atíkka, góuçit baró wá bázar góndha foijjé. Sinderellá baccár gór ottu zendila toratori fare éndila duñri neeli giyói. Fisórtú razar fua ye duñri giyé, lékin, íte dóri faribár agortú Sinderellá añdár ót luwai giyégói.

Duwadit mazé, Sinderellártú íbar anar zuta ekkán fori giyói. Razar fua ye deikí  feñçai loi raikké. Cóñço zuta yían hátot dóri rakí, razar fua ye hoórde, “Zodi añár tú hámaká decót mazé doc matta tuwa foille yó, aññí cúndoijja maiya fua ibá tuaiyóum, zibár tú zuta gán laigga laigga ó. Aññí faile, íba ré cádi goijjóum kiállá hoilé, íbar dhóilla cúndoijja maiya fua aññí honódin loot noófai.” Tarfordín lóti, razar fuar sóicca muhábbót óre tuai bélla toiyari cúru gorí diyé. Decór bútore fottí gór ot mazé zai saár.

Hílsa arde Gílza, ar fottí maiya fuain ókkol, ítarar nizor théñg oré anar zutar bútore sibi sibi gólai bellá kucíc goijjé. Zuta gán endila cóñço dé, honíkkár théñg  bútore no góle. Razar fuar manúic ókkol Sinderellár gór ottú neeli zargói dé étukkun ót mazé, Sinderellá ré bagan ot mazé ham gorérde deikké. Íbar átai maa ye misá banai hoórde, “Ki, íba tó uggwá códoran ham goróni”. “Hámaká, tuñáñrar motolob to íba ré fiñdái saibélla noó to. Íba yé cóbat mazé yó noó uçé”.

Razar fuar maincé Sinderellá ré zuta fiñdái saibélla zurgoijjé. Fiñdái yé motton yián ebbere laigga laigga óiye.

Ze októt mazé Hílsa, Gílza arde íbar átai maa tará córme guzorer, Sinderellá ré boóut duré baccár Razdánór éçe loi zaibélla gór ottú neelai loi giyói. Sinderella arde razar fua cádi goijjé. Yíar baade háyatbor háñci kúci gorí táikke.


❀❀❀❀❀❀Yiáñt Hótom❀❀❀❀❀❀

DOWNLOAD HERE:  SINDRELLÁ