 |
| (ပံု-၁) ဘော်လဖီရာ့ |
ရေးသား 📜 ရိုဟင်လေးအမျိုးအစား 📢 ရိုဟင်ဂျာရိုးရာ အစားအစာ
[ေနြရာသီလဲ ေရာက္ကၿပီ၊ ေနပူျပင္းျပင္းမွာ ကိုယ့္စိတ္ထဲ ေပါေလာေပၚ အတြက္ေပၚေပးတဲ့ ေဘာ္လဖီရာ့ အေၾကာင္းကို မ်ွေဝလိုက္ပါတယ္]
ဘော်လ ဖီရာ့ [မုန့်လက်ဆောင်း]
ဘော်လဖီရာ့ [Bolá Fiçá]သည် နွေရာသီတွင် စားသောက်သော ရာသီအစားအစာ [Seasonal Food] တစ်မျိုးဖြစ်သည်။ မုန့်သရေစာ အဖြစ် သုံးဆောင်ကြသည်။ နေပူကျဲကျဲတွင် အအေးဓာတ် ခံစားနိုင်ရန် စားသောက်သော မုန့်ဖြစ်သောကြောင့် သားန္ဒာ ဖီရာ့ [Tándha Fiçá] (သားန္ဒာ = အေးချမ်းသော၊ အအေး၊ ဖီရာ့ = မုန့်) ဟုလည်း တစ်ချို့က ခေါ်ကြသည်။ လူငယ်တို့၏ အသည်းစွဲ မုန့်တစ်မျိုးလည်း ဖြစ်သည်။ ဤမုန့်ကို ရိုဟင်ဂျာလူမျိုးသာမက မြန်မာနိုင်ငံ အနှံ့အပြားတွင် လူမျိုးအသီးသီးတို့က သုံးဆောင်ကြသည်ကိုလည်း တွေ့ရသည်။ မြန်မာလို မုန့်လက်ဆောင်း ဟုခေါ်ကြသည်။ တန်ခူးလ သင်္ကြန်ပွဲတော်တွင် အများအပြားသုံးစွဲကြသည်။ နွေရာသီတွင် လမ်းခွဆုံ၊ ဈေး၊ ရွာ၊ လမ်းစသည်တို့၌ မုန့်သည်များက ရောင်းချကြသည်ကို တွေ့ရပါမည်။
ပါဝင်ပစ္စည်းများ
၁။ ဆန်မှုန့် [Soilor Guri]
၂။ ထန်းလျက် [Tháiñya]
၃။ အုန်းသီး [Najjol]
၄။ ဆား [Nun]
၅။ နွားနို့/နို့ချဉ် [Dud/Doi]
ပြုလုပ်နည်း
မီးဖိုပေါ် ရေအချိုးအစားထည့်ပြီး ဆူပွက်စေရသည်။ ရေဆူလာသောအခါ ဆန်မှုန့်ကို အနည်းငယ်စီ လောင်းထည့်ပြီး မွှေရသည်။ ဆန်မှုန့်ပျော့ပျောင်းလာသောအခါ မီးဖိုမှ ပြန်ဘေးချပြီး အအေးခံထားရသည်။ ပြီးလျှင် အပေါက်ပါသော ဇကာဗန်းတစ်ခုတွင် အနည်းငယ်စီလောင်းထည့်ကာ မုန့်နှစ်ကို ယောင်းမ သို့မဟုတ် အခြား ပြားပြားလေးတစ်ခုခုဖြင့် ဖိချပေးရသည်။ အထက်က ဖိညှပ်လျှင် ဇကာအောက်တွင် ခံထားသော ရေအေး ထည့်ထားသော ဇလုံကြီးတွင် အစိတ်ငယ်အမျှင်ကြီး(ပုံ-၂) ပုံသဏ္ဌာန်အဖြစ် ထွက်ကျလာသည်။ ဤအခါ မုန့်ဖတ် အသင့်ဖြစ်သွားသည်။
  |
| (ပံု-၂) ဘော်လဖီရာ့ အဖတ် |
ထို့နောက် ထန်းလျက်ပမာဏကို ဒယ်အိုးထဲ ရေအနည်းငယ်ထည့်ပြီး မီးပြင်းပြင်းဖြင့် အရည်ကျိုပေးပြီး မပျစ်မကျဲ အနေအထား ရောက်လျှင် ဆား ပြက်သိကာထည့်ကာ အအေးခံထားရသည်။ ယင်းထန်းလျက်ရည်ကို ရာပ် [Rab]ဟု ခေါ်သည်။ ပြီးနောက် အုန်းသီးများကိုလည်း ခြစ်ထားရသည်။
လိုအပ်သောပစ္စည်းအားလုံး အသင့်ဖြစ်ပြီးလျှင် ခွက်ထဲ ဘော်လဖီရာ့ဖတ် တစ်ဝက်ထည့်ပြီး ထန်းလျက်ရည်နှင့် နို့ သို့မဟုတ် နို့ချဉ်လောင်းထည့်သည်။ အပေါ်ဘက်မျက်နှာ ဖြူဖွေးအောင် အုန်းခြစ်ကြဲထည့်၍ ပြင်ရသည်။ တစ်ခါတလေ ထန်းလျက်ရည်နှင့် နွားနို့အစား အုန်းနို့နှင့်လည်း ပြုလုပ်ကြသည်။
အသင့်ဖြစ်ပြီးဆိုလျှင် စိတ်တိုင်းကြိုက် သုံးဆောင်နိုင်ပါသည်။ ပီတိဖြင့် သုံးဆောင်၍ ပူပြင်းလှသော နွေဦးကိုပင် ပြန်ကျေးဇူးထင်လိမ့်မည်။
ဘော်လဖီရာ့သည် အရသာချိုမြိန်သည်သာမက ရာသီနှင့်လိုက်ဖက်လှ၍ ကိုယ်စိတ်ကို အေးမြစေသည်။ ယခုခေတ်တွင် ရေခဲတုံးများ၊ ရေခဲမှုန့်များ မြို့တောရွာမရွေး ရရှိသဖြင့် ဤမုန့်၏အရသာမှာ ပို၍ ထူးကဲလာလေသည်။ ယခင်ကလို အအေးခံရန် ဒုက္ခခံပြီး နည်းအမျိုးမျိုးကို အသုံးပြုရန် မလိုတော့ချေ။ ရေခဲမုန့် ထည့်ရုံသာနှင့် အေးမြသော ဘော်လဖီရာ့ကို သုံးဆောင်နိုင်ကြသည်။ နွေကျက်သရေ ဖြစ်သောဘော်လဖီရာ့ကို လွယ်လွယ်လေး မြိန်လေတော့။ ရပ်ဝေးနယ်ခြားရောက် မြန်မာပြည်သူပြည်သားတို့သည် နွေရာသီရောက်လျှင် ဘော်လဖီရာ့ကို မလွမ်းဘဲ မနေနိုင်ဖြစ်မည်သာ။ ဤတစ်ခါလောက် ကိုယ်တိုင်းပြုလုပ်၍ သုံးဆောင်ကာ အလွမ်းတရားကို ဖြေဆည်ကြပါလော့။
🍹🍹🍹🍹🍹🍹🍹🍹🍹🍹🍹🍹🍹🍹🍹🍹🍹
No comments:
Post a Comment