Diindahání

Drop Down MenusCSS Drop Down MenuPure CSS Dropdown Menu

Friday, October 28, 2016

Yaqub Poikambor (als) (တမန္ေတာ္ယအ္ကူးဗ္)


Yaqub Poikambor (als) (တမန္ေတာ္ယအ္ကူးဗ္)

Lekóya: Nay Puu Pyinn

Yaqub Poikambor (als) ór súryáni nam accíldé “Isárail".  Issuá ar Isárail Joñikka fua duiní zonot mazé Issuá deki doñr ar Isarail deki cóñro bai accíl. Arobi bácat foormurí ré Aqib hoí dake. Isarail deki Issuá fisóttú oiyé dé étolla arobi ollé Isárail oré Yaqub hoí dakitó. Quraan Córifót Yaqub ar Isarail nam duniyán lootfaza.
Yaqub Poikambor (als) deki Ishaáq Poikambor (als) ór fua, Ibrahím Poikambor (als) ór nati accíl. Yaqub Poikambor (als) deki gaguttara doñr ar bicí cúndor accíl.

Baf Ishaaq Poikambor (als) ar dada Ibrahim Poikambor (als) tará hayáté táite Allah e Yaaqub Poikambor oré nobi hísáfe zimma dari atá fórmaiyé.

 Yakub Poikambor (als) or górgiristí

Yaqub Poikambor e nizor guictí sañsa to boin Laiñya loi Neká goijjé. Laiñya ttú fua (6) wá foida oi oré wafat oi giyoi.  Laiñya entehal ounór baade Yaqub Poikambor e Laiñya r cóñro boin Rahiil oré neká goijjé. Dusára bibi Rahiil ottú Yusúf ar Binyamin hoi fua dui wá oiyé. É bibi duiní zónor mazé bañdi Zulfá tú yó fua sair guá oiyé.

Fuwainór listí nisottún zahér gorá zar.
(Foilar bibi Laiñya r fuwain)
1. Yahuudá
2. Rubiíl
3. Comun
4. Lawi
5. Zabulun
6. Yocjár

(Bibi Zulfár fuwain)
7.    Waan
8.    Toftuná
9.    Jaaz
10.  Uciírá

(Bibi Rahiil or fuwain)
11. Yusúf
12. Binyamin

Muth gorí hoilé Yaqub Poikambor (als) ottú fuwa 12 wá accíl. Ebbe doñr gua Yohuudá ar ebbé cóñro gua Binyamin.

Yaqub Poikambor (als) [boni Isárail ar Yohuudi]

Yaqub Poikambor (als) or súryani nam Isárail dé yán cúruttú huwa giyé. Éttollá Yaqub Poikambor (als) ór nati futi guictíré “Boni Isárail" hoí daké. Boni Isárail lobzó ibá Quraan córif ór zaga zaga ar “Suurá Boni Isárail" hoí suura uggúa yó asé. Yaaqub poikambor or bor fut “Yahuuda"r fózzontó guictí ré "Yohudí" hoí dake. Étolla hókkol Yohudi Boni Isárail ór fózzontó, kintu hókkol Boni Isárail Yohuudí Boni Isárail nóo.

Islámór Tarikin okkol ór hotá mozin Yaqub Poikambor (als) r guictít mazé Rosuul ar Nobi (64000) zón bízzé.

Yaqub Poikambor or Ador ar Sug

Yaqub Poikambor or fuwa barówar(12) bútóttun Poikambor Yusúf oré bicí ador goittó. Yaqub Poikambor e nizor fuwa Yusúf óré hámicá nizor fuwáñti rakító. Fuwa Yusúf Poikambor (als) áñzi zonor mazé Yaqub Poikambor bicí ocánti oiyé. Buot zobaná fán tará baf fut dui zon síra accíl. Yaqub Poikambor e fuwa Yusúf ólla hañdat mazé októ haraitó.
E ofúrani hañdanir zoriya baf or sugór zuti giyé goi. Ek dinná aáñzi giyoi dé fuwa Yusúf Poikambor (als) ór bazuloi sugór ottún fusí loiyé mótton sugór zuti fíri accé.

Yaqub Poikambor or wafát

Yaqub Poikambor (als) e áñzi giyoi dé fuwa Yusúf oré Misírot loot fai 7 bosór baadé (147) bosór boiccót wafát oi Allahr hañsé mulot oiyé goi.

Fuwa Yusúf Poikambor e Baf zan Yaqub Poikambor oré dada Ibrahím (als) ór hobor or hañsé dofón goijjé.
Yaqub Poikambor (als)or hotá Yusúf Poikambor or Kissát ó becá bicí loot fa zaibou.

Nay Puu Pyinn

No comments:

Post a Comment