Diindahání

Drop Down MenusCSS Drop Down MenuPure CSS Dropdown Menu

Friday, October 28, 2016

Gúcor forda algaiyé Zaillaye (လာဘ္ေပးလာဘ္ယူ တို႔ရန္သူ)

Gúcor forda algaiyé Zailla ye




Ek zobanat uggúa Badcá accíl. Taiñ 60 bosór furaiyé dé badcáyi lá doñr fátiya di mancóré dawot diyé.

Badcár uzir ókkolé hána habái bálla nanan dilla sálon ol nalgorér. Ére zóré boyar ai zailla ókkol é mas sai nofaré dé éttola salon ek kisím hom oiyé. Badcár fatiya hisáfé homi óiye dé mas óre fai ballá dec aga gura dhúl mári diyé. 

É ottót hoddúr duróttú mas hanól loi goler ga idé zailla uggúa ré badcá yé dikké. Badcá kúci oi sípayi uggúa diferai badcár dorbarot daki anáiyé. Zailla wá badcár muúntú zehón házer oiló, Badcá yé “O bái zailla, mor dawot ót lageddé mas aní aññr zorurot oré furaiyó dé ettólla, Mas ór dam tottú mone hooddé edun mag hoi " hókum goijjé.

Zailla yé " O badcá huzúr,  mui besára deki e mas ór dam hísáfé cúna, rufa, dón, cóm bottí kessú no sai. Mor firót cúde 50 cúa bettóri do" boli bádurìr sáñté aros goijjé. É ottót badcá yé “o bái zailla, hotá ré fírai abar ho" hoi hókun diyé. Zailla ye foilar dílla tin bar fán aros gorad dara badcá bicí tajub ói  “Zailla ré betor bari 50 cúa asté asté mari oré mas ór dam do" hoi hókum diyé.

Badcár sípayi yé masór dam hísafé betor bari 50 cúa maiggíl dé zailla babote háñci óré zailla ré asté asté marer. Zehón bari 25 cúa furaiyé, zailla ye " tíyo, tiyó. Mottú cíyar uggúa yó asé. Masór dam eddók híssá mor Cíyaijjá loi yó taalukat asé dé étolla baki híssá ré taré do zé" hoiyé. E hotá fúni badcár sípayi okkók é badcá ré zanaiyé. 

Badcá yé " tor cíyaijjá honnúa " hoi fusár goijjé. Zailla ye " Badcá huzúr, dawottót sálon beggún fura oi baáde yó mas ek zat o furon de zaní , é mas óré mui nize baze ai bi ballá geat ór soiñdar oré bar bar ezin maiggí. Kintu geat ór soiñ yé, mui bolé mas ór dam becá bicí faiyum de yánnóllá masór dam or ek dók taré dibo hoi wada goillé góil tó dibo buli hoiyé. Ê tolla mui taloi wada goijjom. É tólla boli mor Cíyaijjá Geath soiñ oré baki bari gún borat gorí do" hoi aros goijjé. 

Zaillar arosór zoriya uzir nazir ókkolé zaillar buddí ré ótfai tajub oi bicí taarif goijjé. Badcá yé yó Geath soiñ oré daki suwala suwali goijjé. Geath soiñ yó inkar gorí bár honó foñt nofai ekrar gorá foijjé. É ottót badcá yé “sípayi ol, e Geath soiñ ré baikká fira gún doró móro di ham ottú félai do" hoi hókum goijjé. Tar baadé " e zailla wá yé aññr Geath soiñ ye gúc hadé yan bala buddí loi sail gorí báduri loi dóri diyé. E zailla ré Geath soiñr zagat, Geath soiñdar hísafé raka zok" hoi hókum di feillé. 

No comments:

Post a Comment