 |
| ဘင်္ဂလားဒေ့ခ်ျသို့ အသက်ကယ် ထွက်ပြေးနေတဲ့ ရိုဟင်ဂျာ အမိနှင့်သမီး၊ ပုံ အင်တာနက် |
🔥 အိုဘယ့် ဒုက္ခ 🔥
☀ဌာနီရွှေမြေ စွန့်ခဲ့လေအောင်
ရမ်းကားမိစ္ဆာ လူသတ်သမား
မီးရှို့လာင်ကျွမ်း ငါ့ဂေဟာ။
☀
တို့ရွာတို့အိမ် အေးရိပ်မိုးကို
နောက်ဆုံးစကား ငါ့ယောက်ျားရဲ့
‘သားကိုကယ်ပါ’ မှာသည့်အတိုင်း
သားကိုပွေ့ချီ ကယ်ရင်းဆယ်ရင်း
ဒိုင်းဒိုင်းအောက်က ထွက်လာခဲ့ရ
နောက်ပြန်တလှည့် ကြည့်ရန်တောင်
အချိန်မပေးခဲ့ပါလား။
☀
တောတောင်ခရီး ကျော်ရေစီး
ဝမ်းစာမပါ ငှက်ပျောအူသာ
ရေငတ်လည်းတုံး ဗိုက်လဲအုံး
တောရိုင်းသံဆူ ကျေးချိုးကူ
ကျောက်ထူတောနက် မှိတ်ရခက်
သားငယ်နိုးထ ရှာဘာဘာ
ဘယ်ကလာမယ် သူ့ဘဘရယ်…
ငို…
တို့တွေလာတုန်း သူကဆုံး
မီးခိုးနက်ထဲ လဲလျောင်းသာလေ။
☀
တတောင်တက် တတောင်ဆင်း
လမ်းကူမရှိ ဖော်မရှိ
ဘယ်ဆီဘယ်ရောက် တို့မသိ။
ဝသန်မိုးကား သနားစရာ
ရွာလိုက်တန့်လိုက် ပြင်းလိုက်တာ။
ထီးလဲမပါ ဆောင်းစရာ
သားငယ်ချမ်းတုန် ခုဆုံးပမာ
လက်ခမောက်နဲ့ အုပ်လို့ထား
နေပူအလာ စိတ်အောင့်ရ
အဝတ်ကစို သားလဲစို
သားကိုယ်ပွေ့ဖက် နွေးစေသား။
☀
လူသွားခြေရာ လမ်းဖြစ်သွား
ရွံ့နွံထူထပ် စေးကပ်ပမာ
လျှောက်ရတာလဲ အားနည်းချည်းလာ၊
ဟိုးမှောင်ရီရီမှာ လူအုပ်တစု
ထုပ်ပိုးကိုယ်စီ မှုန်ရီရီ
မြင်ရသော်လည်း
ကျယ်လောင်ငါ့သံ မကြားရပါတကား။
☀
နွားအုပ်ထိန်းမဲ့ လယ်ကွင်းပြည့်
စပါးဖူးလက်ဆုပ် ဆင်းယူနုတ်
ပုံပြင်ပြောကာ သားအားကျွေး
ဦးကြီးကျေးဇူးလဲ မနည်းလှချေ။
သုံးညကျော်ပြီ မျက်စိမမှိတ်တာ
လယ်သင်းပိုင်ပေါ် ခေါင်းအုပ်လို့သာ
ဝေဟင်အောက်မှာ ပျော်သွားခဏလေး။
☀
အိပ်မက်ထဲမှာ သားရဲ့ဘဘ
ပြုံးကာအားပေး မပူနဲ့လေ
နင့်ကိုပေးတာ ဂုဏ်ယူစရာ
ငါ့သားကြီးလာရင် ပညာရှင်ဟု
တို့ရဲ့နံမယ် ပဲ့တင်ခတ်မယ်။
သားဘယ်မှာလဲ မုန့်ပေးရအောင် ဟု
ဆိုရုံနဲ့ လှန့်ကာနိုးထ
ပါးစပ်က သားသား
ဘေးပတ်ကြည့်သော် သားကိုမမြင်
ဟိုပြေးဒီပြေး ရှာရှာကာ
သားရယ်…သားရယ်နဲ့ ခေါ်လိုက်ငိုလိုက်
မျက်စိတချက် နွားအုပ်ဖက်
သားပျော်နွားလယ် ကစားနေ
သက်ပူပြင်းပြင်း ချလိုက်အေး။
☀
ပန်းတိုင်မရှိတဲ့ ငါတို့ခရီး
လျှောက်လေလျှေက်လေ တာကမနီး
ဇီဝခွန်အား ပျော့ပြောင်းချည်း
မျက်ရည်တောင် ခမ်းခြောက်ကုန်ပြီလော့
သားကိုယ်ပူချိန်လဲ မြှင့်လေတော့
မျှောက်လင့်ချက်က နေဝင်ပြီလားဟု
ယောက်ျားမှာစကား ကြားယောင်ယောင်နဲ့
ငါ့မေတ္တာက ရှုံးဆဲဆဲတွင်
ဒီရေအကျ စောင့်နေခိုက်
ကမ်းစပ်ရွှံ့ပေါ် သားမိတဖက်စီ
လဲလျောင်းသတိလစ်နေတာဟု
ကျေးဇူးရှင် ကယ်တင်ရှင်
လူတစ်စုက ဘင်္ဂလားတဲမှာ
သတိပြန်လာချိန် ပြောသွားလေတည်း။
☔☔☔☔☔☔☔☔☔☔☔☔☔☔☔☔☔☔☔☔
ရေးဖွဲ့ ⚡ ရိုဟင်လေး
အောက်တိုဘာ ၁၅၊ ၂၀၁၇ (၂း ၃၁)
မှတ်ချက်။ ဘူးသီးတောင်မြို့နယ်မှ အသက်ကယ် ထွက်ပြေးလာခဲ့သော သားအမိနှစ်ယောက်၏ ဒုက္ခမျိုးစုံကို ရင်ဆိုင်ရင် ဘင်္ဂလားဒေ့ခ်ျနိုင်ငံ၊ ရိုဟင်ဂျာ ဒုက္ခသည်စခန်းသို့ ရောက်လာသည့် လမ်းခရီးအဖြစ်အပျက် အမှန်ကို ကဗျာဖွဲ့ မှတ်တမ်း တင်ခြင်းဖြစ်သည်။
 |
| မိုးရေစိုစွတ်လျက် နတ်မြစ်အနီးတွင် ကယ်မယ့်သူ စောင့်နေသည့် ရိုဒုက္ခသည် မိသားစု၊ ပုံ- အင်တာနက် |
No comments:
Post a Comment