Wuzu [ الوضوء‎‎ ]

Wuzu ki?

Arobi lobzó “Wudu” maáni oildé Pak ói bóllá, cúndor oi bóllá yá sáf oi bóllá honó ham gorón. 

Wuzu r Islamór corayi maáni oildé  Nomas ór age Allah (SWT) ar Allahr Rosul(s) or icára mozin gaár doijjá híssá okkól dúwon.  

Wuzu goríbár torika

Pak faní loi cúruttú hát duníyan sur girá fán (3) bar dúwon. Baáde (3) bar kuli gorón. Baáde (3) nak or bitor faní di dúwon. Baáde guñra muk (3) bar dúwon. Baáde duní hátor kinkeni fán (3) bar dúwon. Baáde matá, han, goddana okkól oré Mosáh goron. Baáde téñgor sur girá fán (3) bar dúwon. 

Wuzur fóros howán?

Wuzur fóros (4) gán. Kiki hoilé…
1. Kuwalot sulor guijja lóti zaim or nise fán, den dákor han lóti ban dákor han fán, guñra muk oré dúwon.
2. Duní hátor kinkeni có dúwon.
3. Matá ré sair bák góri ek bák bíza hat loi mosáh goron. 
4. Duní téñg or sur girá fán dúwon.

Monot raikkó: Uoror fóros gun dúité sul borabor no bízi tákile Wuzu no óibo.

Wuzur súnnót howán? Kiki?

Wuzur súnnót (13) wán. Kiki hoilé-
1. Niyot gorón.
2. Bismillla Hirrahma Nirrahim' hoi cúru gorón.
3. Cúruttú hátor sur girá fán (3) bar dúwan.
4. Miswak gorón.
5. (3) bar kuli gorón.
6. Nak or bítor tinbar fanídí dúwan.
7. Darí ré hátor oñl loi kílail gorón.
8. Hát or téñgor oñlor cére bíza haté fusílon.
9. Fotti yian oré (3) bar gorí dúwan.
10. Guñra matá ré ek bar mosáh gorón.
11. Duní han oré mosáh gorón.
12. (Ekkuttú lóti) Ekkán baáde ekkán dúwon.
13. Ekkán no fúwaité ar ekkán dúwon.

Monot raikkó: E súnnót gun goli zailoi wazu óizaiboi. Mogor súwan homi zaiboi.

Wuzur Mustaháb howán? Iín kiki?

Wuzur Mustaháb (5) án. Kiki hoilé-
1. Den dákottún cúru gorón.
2. Goddona ré mosáh gorón.
3. Wazu gorí baiccót ar ekzon or modot noloi nize baze dúwon.
4. Kiblar uzu muudon.
5. Pak sáf usol zagat boi wazu banon.

Monot raikkó: E mustaháb gún goillé súwab barái faiba. No goillé háni no óibo.

Wuzur Mokru howán? Iín kiki?

Wuzur Mokru (4) gán. Kiki hoilé-
1. Hoñsara(nafak) zagat boi wuzu banon.
2. Den háte nak dúwon.
3. Wazu gorí báiccót duniyabi hotá hoón.
4. Súnnót or uldha gorón.

Monot raikkó: Iin ottú wuzu gorí báiccót basa fori bó.

Wuzu báñgge dé ham howán? Iín kiki?

Wuzu báñgge dé ham (8) wán. Kiki hoilé-
1. Fecák, fehéna gorón yá fisár rastattú honó kessú nealon.
2. Boiyar haçon.
3. Gar honó zagattún loo, fuñc baai foron.
4. Gal bóri hoo gorón.
5. Sit oi, hait oi, tek lagai gúm zon.
6. Bihúñc oilé.
7. Fool óilé.
8. Nomasot ketkerái háñcon.
9. Ar ekzon or córom zagaré cáhawót loi dóron.

Javiráh hodé ki?

Javiráh hoódé hát téñg báñgi lé bañdedé cíl faththi (yá) honó zohóm or uoror faththi ré hoó.

 Wuzu gorí báiccót faththi ré mosáh gorí bár ejazot asé né?

Wuzu gorí báiccót faththi ré mosáh gorí bár nisor (3) torika loi ejazot diya giyé.
1. Honó mockil no tákilé kúli oré faní loi dúwa foribó.
2. Kúli fare, mogor zohóm oré faní loi dúi le biyaram barí bár hótara takílé zohóm óre mosáh gorá foribó.
3. Kúlí nofaré, aró kúli le biyaramor hótara takílé faththir uorttún mosáh gorí bár ejazot asé. 

Faththir hoddur fán mosáh gorá fori bó?

Guñra faththi ré mosáh gorá fori bó. Cúde zohóm asé dé zaga ré mosáh goillé no óibo.

✴✴✴✴✴✴✴✴✴✴✴✴✴✴✴✴✴✴✴✴✴✴✴